Babək

Ölkəyə gələn turistlərin sayı 3 mln. nəfərə çatacaq

Dünən Bakı Turizm İnformasiya Mərkəzində Mədəniyyət və Turizm Nazirliyi ilə BMT-nin İnkişaf Proqramı (BMT İP) arasında “Daxili turizmin səmərəli inkişafına kömək məqsədilə Mədəniyyət və Turizm Nazirliyinə İnstitusional Yardım” layihəsinin ikinci mərhələsinin başlanmasına dair sənədin imzalanma mərasimi keçirilib. Sənədi Mədəniyyət və Turizm naziri Əbülfəs Qarayev və BMT-nin İnkişaf Proqramının Azərbaycandakı prezident nümayəndəsi Bruno Pueza imzalayıb.

İki illik layihə yeni təsis edilmiş Turizm institutuna turizm sahəsində təhsilin inkişaf etdirilməsində İnstitusional yardımın göstərilməsinə və layihənin I mərhələsində açılmış (Bakı, Şamaxı, Xaçmaz, və Şəki) və II mərhələsi ərzində fəaliyyətə başlayacaq (Gəncə, Naxçıvan, Lənkəran və Quba) Regional Turizm Mərkəzlərinin səmərəli fəaliyyəti üçün yardımın göstərilməsinə yönəlib.

Sənədin imzalanma mərasimində Mədəniyyət və Turizm naziri Ə.Qarayev bildirib ki, nazirlik (80%) və BMTİK tərəfindən (20%) maliyyələşdiriləcək bu layihə Azərbaycanda yoxsulluğun azaldılması və turizmin davamlı inkişafı arasında əlaqənin yaradılması istiqamətində nazirliyin və BMT İP-in göstərdiyi birgə səylərin davamıdır. Layihə Yoxsulluğun Azaldılması və Davamlı İnkişaf üzrə Dövlət Proqramına uyğun tərtib edilib və 2005-2009-cu illər üçün Birləşmiş Millətlər Təşkilatının İnkişafa Yardım Çərçivə Proqramının (UHDAF) I məqsədinə - "Neft ehtiyatlarının səmərəli və şəffaf idarəetmə qeyri-neft sektorlarında lazımi məşğulluğun çoxalmasına" xidmət edəcək. Nazir hesab edir ki, regionlarda turizm üzrə informasiya mərkəzlərinin açılışı bu rayonlarda əhalinin məşğulluğu üçün yaxşı imkanlar yaratmaqla yanaşı, onların sosial həyat səviyyəsini yaxşılaşdıracaq.

Ə. Qarayev ölkədə fəaliyyət göstərən turizm şirkətlərinin fəaliyyətinə də toxunub. Keçən illərlə müqayisədə turizm xidməti göstərən şirkətlərin sayının xeyli artdığını söyləyən nazirin fikrincə, belə şirkətlərinin sayı 300-350-dən artıq olmamalıdır: "Azərbaycanda 2001-ci ildə cəmi 30-a qədər turizm şirkəti var idisə, bu gün onların sayı artıb. Lakin Azərbaycan bazarında bu şirkətlərin sayı 300-350-dən artıq olmamalıdır. Çünki Azərbaycanda turizm bazarı, xüsusilə də xaricə insanların səfərini təşkil edən və ölkəmizə qəbul edən şirkətlərin bazarı geniş deyil. Amma daxili turizm üçün bazar açıqdır və çoxlu sayda təşkilatlar fəaliyyət göstərə bilər". Nazir qeyd edib ki, əvvəlki illərdə turizm fəaliyyəti üçün lisenziya haqqı 500 manat idisə, hazırda beşillik fəaliyyət üçün rüsum 5 min 500 manatdır.

Qeyd olunub ki, yaxın illərdə Azərbaycana turist səfərlərinin üç milyon nəfərə çatdırılması planlaşdırılır. Nazirlik ötən ilə dair açıqlamalarında turist səfərlərinin bir milyona qədər olacağını proqnoz vermişdi. Ə.Qarayev bu proqnozun tam olaraq özünü doğrultmadığını, lakin buna yaxın rəqəm əldə olunduğunu deyib: "Bu il Azərbaycana bir milyondan çox turistin gəlməsi nəzərdə tutulub. Bu göstərici ötən ilki göstəricidən çoxdur. Yaxın üç il ərzində isə turizmin inkişafı üzrə dövlət proqramının həyata keçirilməsi nəticəsində ölkəyə gələcək turistlərin sayı üç milyondan çox olacaq. Amma bu, təkcə bizdən asılı olan məsələ deyil. Burada təhlükəsizlik, bölgədəki geopolitik məsələlər də rol oynayır. Dövlətin məqsədi təkcə xaricdən gələn turistlər üçün deyil, həm də Azərbaycanın öz vətəndaşları üçün yüksək turist xidmətləri yaratmaqdır".

Ə.Qarayev Azərbaycan vətəndaşlarına Şengen vizasının verilməsi prosedurunu sadələşdirmək istiqamətində iş aparıldığını da söyləyib. Qeyd edək ki, Şengen viza zonasının bir sıra dövlətləri Azərbaycan turistləri üçün problemlər yaradır. Belə ki, nazirliyə daxil olan məlumata əsasən, bir sıra Avropa dövlətlərinin konsulluq şöbələri Avropa ölkələrinə turist turları həyata keçirmək arzusunda olan Azərbaycan vətəndaşlarına viza vermir: "Hazırda nazirlik vətəndaşlarımıza vizanın verilməsi prosedurunun sadələşdirilməsi ilə bağlı Avropa dövlətlərinin səfirlikləri ilə danışıqlar aparır. Prosesə Xarici İşlər Nazirliyi də cəlb olunub".

Nazirin digər məlumatı lisenziya almayan mehmanxanaların fəaliyyətinin dayandırılması ilə bağlı olub. O bildirib ki, ölkədə fəaliyyət göstərən bütün mehmanxanaların araşdırılması nəzərdə tutulur: "Lisenziya almayan, dövlət qanunlarına riayət etməyən mehmanxanaların fəaliyyəti məhdudlaşdırılacaq. Bütün lisenziyaları əldə edən mehmanxanalar üç ay müddətində təkrar sertifikat almaq üçün müraciət etməlidir ". Qeyd edək ki, hazırda ölkədə 290 mehmanxana qeydiyyata alınıb. Lakin onlardan yalnız 60-a qədəri müvafiq normativlərə uyğun olaraq ulduzlarını alıb. "Nazirlik yalnız ulduzlarını alan mehmanxanaların keyfiyyət səviyyəsinə cavabdehdir" - deyən nazir əlavə edib ki, bu yaxınlarda üç böyük şirkətə mehmanxana lisenziyası verilib. Ölkədə turizm xidmətlərinin səviyyəsini yüksəltmək, beynəlxalq standartlara uyğunlaşdırmaq üçün lazımi normativ tədbirlər həyata keçiriləcəyini söyləyən nazir. onu da əlavə edib ki, mehmanxanaların 5 il üçün lisenziya haqqı 1500 manatdır.

Azərbaycanı dünyanın turist mərkəzlərindən birinə çevrilməsi üçün əlverişli imkanları olan bir ölkə kimi xarakterizə edən BMT İP-nin ölkəmizdəki rezident-əlaqələndiricisi Bruno Pueza bildirib ki, respublikamızın coğrafi mövqeyi onu turistlər üçün cəlbedici edir. Yeni layihənin ölkəmizdə turizmin inkişafına xidmət edəcəyinə əmin olan B.Pueza əlavə edib ki, BMT İP bundan sonra da Azərbaycanın turizm sahəsinin inkişafı üçün yardım göstərəcək.

Paritet.- 2007.- 3-4 aprel.- S. 12.