Mütəllimova S.

Mədəniyyət-bütün xalqları birləşdirən əsas həlqədir

Azərbaycanda ilk dəfə keciriləcək Milli Kulturoloqlar Forumu Mədəniyyət və Turizm Nazirliyinin təşkilatçılığı ilə may ayının 4-də baş tutacaq. Forum haqqında geniş məlumatı oxucularımıza catdırmaq üçün Nazirliyin elm və təhsil şöbəsinin müdiri, pedaqoji elmlər namizədi Yaşar Əliyevdən bəzi məqamlara aydınlıq gətirməsini xahiş etdik.

-Yaşar müəllim, Forumu keçirməkdə məqsəd nədir?

-Hər bir xalqın özünəməxsus xüsusiyyətləri var və onları biri-birindən fərqləndirən də məhz həmin xüsusiyyətlərdir. Amma xalqları birləşdirən yeganə məqam var: mədəniyyət. Bu gün Mədəniyyət və Turizm Nazirliyində həyata keçirilən mədəniyyət siyasəti, onun tərkibində mədəniyyətin təbliği, təşviqi çox vacib məsələdir. Bütün bu proseslərdə isə elmin əvəzsiz rolu vardır. Təbii ki, bir tərəfdən elm və təhsil şöbəsinin müdiri olduğuma görə vəzifə borcu kimi və digər tərəfdən bizim qarşımıza qoyulan vəzifələr baxımından, biz mədəniyyətimizin inkişafına, təbliğ və təşviqinə, tədqiqinə çalışmalıyıq. Bu baxımdan araşdırmalarla, aparılan tədqiqatlarla, kecirdiyimiz tədbirlərlə seçilməliyik və bunları həyata keçirməliyik. Həmin tədbirlərdən biri də hörmətli nazirimizin tapşırığı ilə ilk dəfə olaraq keçiriləcək Azərbaycanın Milli Kulturoloqlar Forumudur. Kulturologiya əslində mədəniyyətşünaslıqdır. Bu sahə incə olmaqla yanaşı, həm də çox mürəkkəbdir. Bizim məqsədimiz fundamental tərəfdən bu sahəylə məşğul olan alimləri, xüsusən gənc alimləri bir araya gətirməkdir. Birlikdə mədəniyyətin gələcək inkişafı barədə söhbətlər aparaq, perspektivləri müəyyənləşdirək. İnanıram ki, Milli Kulturoloqlar Forumu müəyyən uğurlar qazanacaq. İndidən ciddi hazırlıq işləri görülür. İlk forumdan sonra bizdə müəyyən təcrübə toplanacaq ki, gələcəkdə beynəlxalq səviyyədə keçirilən kulturologiya forumlarında iştirak edək.

-Foruma xarici ölkələrdən qonaqlar dəvət etmisinizmi?

-Qeyd edim ki, Forumu beynəlxalq səviyyəyə çatdırmaq məqsədilə xarici ölkələrdən mədəniyyətşünaslıq üzrə görkəmli alim və mütəxəssislər dəvət olunacaq. Rusiya Federasiyasından qonağımız olacaq. Almaniyadan Azərbaycanşünas alim Rau İoqann və başqaları gələcək. İnanıram ki, Forum yüksək səviyyədə keçiriləcək. Elanlardan, internet saytlarında yerləşdirilən məlumatlardan bilirsiniz ki, Forum ərəfəsində "Mədəniyyət - sərvətimizdir" şüarı ilə "Müasir Azərbaycan mədəniyyəti: problemlər və perspektivlər" adlı elmi məqalələrin müsabiqəsi elan olunub. Müsabiqə üç nominasiya üzrə gənc alim, aspirant və magistr-bakalavrlar arasında keçiriləcəkdir. Universitetlərdə afişalar asılıb. Artıq şöbəmizə çoxlu sayda müraciətlər, telefon zəngləri olunmaqdadır. Məqalələrin necə, hansı formatda yazılması, axırıncı təqdimat günü ilə maraqlanırlar. Qeyd edim ki, aprelin 24-ü müsabiqənin axırıncı günüdür.

-Münsiflər heyətində kimlər olacaq?

-Mən onların adlarını çəkmək istəməzdim, bu düzgün deyil. Bircə onu qeyd edim ki, münsiflər heyətində çox hörmətli alimlərimiz olacaq. Bu nominasiyalar üzrə təqdim edilən elmi məqalələrin qiymətləndirilməsinin şəffaflığını, iştirakçılara qarşı diqqətimizi, onların fədakarlığını, arzularını nəzərə alaraq müsabiqədə iştirak edənlərin məqalələrinin toplusu nəşr ediləcək.

-Forum neçə gün davam edəcək?

-Mayın 4-ü və 5-i. Forumun ilk gününü Muzey Mərkəzində keçirmək nəzərdə tutulub. Həmin gün rəsmi çixışlar və qaliblərin mükafatlandırılması olacaq. İkinci gün isə seksiyalarda iclaslar keçiriləcək. Bu da Azərbaycan Turizm Universitetində baş tutacaq.

-Həm dövlət başcısı cənab İlham Əliyevın mədəniyyətə göstərdiyi diqqət, həm Heydər Əliyev Fondunun prezidenti, YUNESKO-nun xoşməramlı səfiri, millət vəkili Mehriban xanım Əliyevanın, həm də Mədəniyyət və Turizm Nazirliyindəki struktur dəyişiklikləri əvvəllər mövcud olan problemlərin həllində mühüm rol oynayır. Bu barədə bir mütəxəsis kimi sizin fikirlərinizi öyrənmək maraqlı olardı.

-Dövlət başçısı İlham Əiiyevin, YUNESKO-nun xoşməramlı səfiri, Heydər Əliyev Fondunun prezidenti, millət vəkili Mehriban xanım Əliyevanın Azərbaycan mədəniyyətinin inkişafındakı rolu danılmazdır. Mədəniyyətlə bağlı son bir neçə ayda respublika Prezidentinin imzaladığı sərəncamlar bu sahədə həyata keçirilən tədbirlərin, görülən işlərin sırasını xeyli genişləndirib. Həmin sərəncamlar eyni zamanda məsuliyyətimizi də artırır ki, biz qarşıya qoyulmuş vəzifələrin öhdəsindən gələk və cənab Prezidentin etimadını doğruldaq. Birbaşa Mehriban xanımın dəstəyi ilə, YUNESKO-nun xəttilə bizim musiqi məktəblərinin tələbələri ABŞ-da Vaşinqtonda konsert vermişlər. Həmin tərkib Moskvada da konsert proqramı ilə çıxış etmişdir. Son vaxtlar CNN və Evronyus kanallarında Azərbaycanın səfalı guşələri, tarixi abidələri, mədəniyyət abidələri kliplər vasitəsi ilə tanıdılır və təbliğ olunur. Gördüyünüz kimi, mədəniyyət sahəsində böyük canlanma var və inanıram ki, bu canlanma az vaxtda öz yüksək bəhrəsini verəcək.

Mədəniyyət.- 2007.- 13 aprel.- S. 4.