Turanə

Azərbaycanda Moskva Mədəniyyət Günləri keçiriləcək

Əbülfəs Qarayev: İşğal olunmuş ərazilərinə YUNESKO missiyasının gəlməsi ləngiyir

Dünən mədəniyyət və turizm naziri Əbülfəs Qarayev Azərbaycanla Rusiya arasında mədəni əlaqələrinə həsr olunmuş mətbuat konfransı keçirib. Nazir Moskvada Azərbaycan Mədəniyyət Günlərinin uğurla keçirildiyini deyib. O, bu il oktyabrın ilk həftəsində isə Azərbaycanda Moskva Mədəniyyət Günlərinin keçiriləcəyini, hazırda Moskvada tədbirlər proqramının hazırlandığını bildirib. Nazir Norvec səfərinin də müvəffəqiyyətlə gerçəkləşdiyini, iki ölkə arasında muzey işi sahəsində bir sıra əməkdaşlıqların həyata keçiriləcəyini qeyd edib: “Norveclə muzey işi sahəsində əlaqələrin genişlənməsinin tərəfdarıyıq. Artıq ilkin danışıqlar baş tutub və yaxın vaxtlarda qarşılıqlı protokollar imzalanacaq. Bundan sonra muzey işçilərimiz Norvecin praktikasından istifadə edə biləcək”. Nazirin sözlərinə görə, Azərbaycan ilk dəfə olaraq Venesiyada keçiriləcək rəssamların beynəlxalq festivalında təmsil olunacaq. Festivalın iyulun 6-da keçiriləcəyini deyən Ə.Qarayev burada müasir rəssamların avanqard əsərlərinin nümayiş etdiriləcəyini vurğulayıb. Mətbuat konfransında nazir mədəniyyət ocaqlarında aparılan təmir işlərindən də danışıb: “Hazırda Heydər Əliyev adına Saray, Rus Dram Teatrı, Gənc Tamaşaçılar Teatrı, Kukla Teatrı, İncəsənət Muzeyində əsaslı təmir işləri aparılır. Opera və Balet Teatrı, Akademik Milli Dram Teatrı da təmir olunacaq”. Ə. Qarayev Azərbaycan turizminin inkişafı üçün bir sıra layihələrin həyata keçirləcəyini də qeyd edib. Nazirin sözlərinə görə, yaxın vaxtlarda Azərbaycanın turizm mütəxəssiləri Çin, Dubay və Pakistana səfər edəcək.

Ə. Qarayev Azərbaycanın işğal olunmuş ərazilərində tarixi-mədəni abidələrin məhv edilməsi ilə bağlı YUNESKO missiyasının aprelin sonu-mayın əvvəlində gözlənilən səfəri ilə bağlı da sualı cavablandırıb. Nazirin sözlərinə görə, bununla bağlı YUNESKO-dan indiyə qədər heç bir rəsmi cavab gəlməyib.

Ə.Qarayev, həmçinin, bildirib ki, Azərbaycanda “İstiqlaliyyət” abidəsinin hazırlanmasına və muzeyin yaradılmasına 100 min dollar vəsait xərclənəcək. Nazir layihənin həyata keçirilməsi üçün elan olunan tenderin uğurla davam etdirildiyini və tanınmış mütəxəssislərin bu layihədə iştirak etmək istədiyini vurğulayıb: “İlk dəfədir ki, bir tender üçün 100 min dollar vəsait ayrılıb. Tenderin nəticələri oktyabrda məlum olacaq, qalib bu vəsaitlə layihəni gerçəkləşdirəcək”.