Azər İlmənin xalçaları beynəlxalq mükafatlar almışdır

"Azər-İlmə" Məhdud Məsuliyyətli Cəmiyyətindən AzərTAc-a bildirmişlər ki, müəssisənin baş direktoru Vidadi Muradova Böyük Britaniyanın Oksford şəhərində yerləşən Avropa Biznes Assambleyasının qərargahında qurumun ən yüksək "Kraliça Viktoriya adına mükafat"ı təqdim olunmuşdur.
Müəssisə bu mükafata keyfiyyətli məhsul istehsalı ilə Avropa bazarlarında özünə layiqli yer tutduğuna, Avropa iqtisadi əməkdaşlığına səylə inteqrasiya etdiyinə, Azərbaycan xalçasının tarixi şöhrətini böyük uğurla yaşatdığına görə layiq görülmüşdür.
Müəssisəyə daha bir xoş xəbər isə Xəzər Beynəlxalq İnteqrasiya İşgüzar Klubundan gəlmişdir. Azərbaycan xalça sənətinin dirçəldilməsi və inkişafında xidmətlərinə görə "Azər-İlmə" xüsusi mükafat almışdır.
Qeyd edək ki, "Azər-İlmə" şirkəti fəaliyyətə 1996-cı ildə başlamışdır. Bakının Nardaran, Binə, Hökməli, Lökbatan qəsəbələrində, həmçinin Kürdəmir və Lerik rayonlarında şirkətin toxuculuq emalatxanaları fəaliyyət gösərir. Müəssisədə 500 nəfərdən çox işçi çalışır.

Azərbaycan.-2007.-3 aprel.-S.8.