Xanım Bricit Birleyn: Azərbaycanın zəngin xalçaçılıq sənəti vardır

Azərbaycanda səfərdə olan Avstriya Konstitusiya Məhkəməsinin sədr əvəzi xanım Bricit Birleyn aprelin 20-də "Azər-İlmə" Məhdud Məsuliyyətli Cəmiyyətinin "Sehrli ilmələr" qalereyasında olmuşdur.
Xanım Bricit Birleynə məlumat verilmişdir ki, xalçaçılıq Azərbaycan xalqının ən qədim sənətlərindən biridir. Qədim səyyahlar, salnaməçilər ölkəmizdə toxunan xalı-xalçanın yüksək keyfiyyəti, zəngin çeşniləri barədə yazılı məlumatlar vermiş, Şirvan, Təbriz, Qarabağ, Qazax, Gəncə, Quba xalçalarının Böyük İpək yolu üstündəki bütün ölkələrdə məşhur olduğunu bildirmişlər. Azərbaycanın xalı və xalçaları indi də dünyanın bir çox muzeylərinin ən nadir eksponatlarından sayılır. 1996-cı ildən fəaliyyətə başlamış, hazırda 350 nəfərin çalışdığı bu müəssisənin məhsulları ABŞ, Almaniya, Avstriya, İngiltərə, İtaliya, Yaponiya və Rusiyada keçirilən satış sərgilərində xüsusi mükafat və sertifikatlara layiq görülmüşdür. Mərkəzi qərargahı Böyük Britaniyada - Oksfordda yerləşən Avropa Biznes Assambleyası özünün yüksək "Kraliça Viktoriya adına mükafat"ını bu günlərdə keyfiyyətli məhsul istehsalı ilə Avropa bazarlarında özünə layiqli yer tutduğuna, Avropa iqtisadi-ticarət məkanına səylə inteqrasiya etdiyinə, Azərbaycan xalçasının tarixi şöhrətini böyük uğurla yaşatdığına görə "Azər-İlmə"yə vermişdir. Müəssisədə yun və ipəkdən istehsal olunan, işləmələrin incəliyi və yüksək sıxlığı, tərtibatın orijinallığı, milli koloriti ilə seçilən xalçaları bütün beynəlxalq standartlara cavab verir. İpləri boyamaq üçün ancaq təbii rənglərdən istifadə edilir, eskizlər yalnız milli naxış və çeşnilərdən götürülür. İşlədilən bütün xammal yerli məhsullardır.
Hörmətli qonaq qalereyanın zəngin eksponatlarına baxdı, boyama, toxuma prosesini maraqla izlədi, xalçaçı qızlarla səmimi söhbət etdi. Xanım Bricit Birleyn toxucuların köməyi ilə hanada toxunan orijinal kompozisiyalı xalçaya bir neçə ilmə də vurdu və bunun çox çətin, incə peşə olduğunu qeyd etdi.
Xanım Bricit Birleyn "Sehrli ilmələr" qalereyasının xatirə kitabına yazdığı ürək sözlərində Azərbaycan xalçalarının gözəlliyindən, ölkəmizdə qədim el sənətinin belə məhəbbətlə yaşadılmasından məmnun qaldığını, bu xalça muzeyindən zəngin, unudulmaz təəssürat aldığını bildirdi.
Hörmətli qonağa xatirə olaraq hədiyyə verildi.

Azərbaycan.-2007.-21 aprel.-S.7.