Azərbaycan və Amerika teatrı bir arada

Əcnəbi rəssam Bredli Helm “Azdrama”da görüş keçirib

Amerikadan ölkəmizə rəssam Bredli Helm təşrif buyurub. O, ötən gün Akademik Milli Dram Teatrında Azərbaycan teatr rəssamları - xalq rəssamı Nazim Bəykişiyev, əməkdar rəssam İsmayıl Məmmədov, Lətifə Quluzadə, Elnur Babayev və Valeh Məmmədovla görüşüb. Xarici qonaq müasir Amerika teatrında mövcud meyl və tendensiyalar, problem və nailiyyətlər barədə məlumat verib. Həmçinin görüş iştirakçılarını öz sənət əsərləri ilə tanış edib. İnteraktiv sual-cavab tərzində keçirilən bu görüşdə qonaq Azərbaycan mədəniyyəti və incəsənəti ilə yaxından tanış olub.

Teatrın mətbuat xidmətinin rəhbəri Nigar Abdullayevanın sözlərinə görə, “Azdrama” ABŞ səfirliyinə birgə teatr layihəsi təşəbbüsü ilə müraciət edib. Layihənin məqsədi, görkəmli Amerika dramaturqu Artur Millerin «Körpüdən mənzərə» pyesi əsasında tamaşanın milli teatrımızın səhnəsində hazırlanması üçün beynəlxalq quruluşçu heyətin yaradılmasıdır. Elə Bredli Helmin Bakıya səfəri də «Azərbaycan–Amerikan teatr təşəbbüsü» layihəsi ilə əlaqədardır. Qeyd edək ki, tamaşanın quruluşçu rejissoru – xalq artisti, teatrın baş rejissoru Mərahim Fərzəlibəyov və quruluşçu rəssam Bredli Helmdir.

Layihə Azərbaycan Mədəniyyət və Turizm Nazirliyi və ABŞ səfirliyinin dəstəyi ilə Milli Dram Teatrında həyata keçiriləcək. Premyera iyuna planlaşdırılır.

Gündəlik Azərbaycan.-2007.-14 aprel.-S.14.