Mozalan studiyası yenidən fəaliyyətə başlayır

Muzey Mərkəzində Mədəniyyət və Turizm Nazirliyinin, Azərbaycan Rəssamlar İttifaqının və Karikaturaçı Rəssamlar Birliyinin təşəbbüsü ilə "Mozalan" studiyasının yenidən fəaliyyətə başlamasına həsr olunmuş tədbir keçirilib. APA-nın məlumatına görə, tədbirdə çıxış edən "Mozalan" studiyasının bədii rəhbəri və direktoru Orxan Fikrətoğlu studiyanın fevralın 12-dən fəaliyyətə başladığını deyib: "Artıq filmlərin çəkilişinə də başlamışıq. "Mozalan" studiyası Azərbaycanda görünən bütün neqativ halları tənqid edəcək. Bizim üçün heç bir sədd olmayacaq. Azərbaycanda elə məmurlar var ki, onlar dövlətə, xalqa deyil, özlərinə işləyirlər və bizim borcumuz bu cür məmurları ifşa etməkdir". Mədəniyyət və turizm naziri Əbülfəs Qarayev studiyanın yenidən fəaliyyətə başlamasını alqışlayıb və yaradıcı heyətə uğurlar arzulayıb: "Müəyyən dövrdə bu vəzifənin öhdəsindən çox yaxşı gəlmişik. Sovet İttifaqının totalitar ideologiyasının hökm sürdüyü dövrdə "Mozalan" Azərbaycanda özünəməxsus yer tapıb. Bu gün bu işə daha geniş formada yenidən başlamağa və daxildə gedən prosesləri tənqid etməyə ehtiyac var. Azərbaycan vətəndaşı olan, ancaq ölkəsinə xidmət etməyən insanlar tənqid olunmalıdır. Tənqidi baxış bizi inkişafa aparacaq". Ə. Qarayev studiyanın təşəbbüsü ilə bir sıra layihələrin həyata keçiriləcəyini deyib. Qeyd edək ki, "Mozalan"da beynəlxalq festivallara qatılmaq üçün xüsusi filmlər çəkiləcək. Bu barədə studiyanın bədii rəhbəri və direktoru Orxan Fikrətoğlu məlumat verib. O bildirib ki, beynəlxalq festivallara təqdim olunacaq filmlərdə Azərbaycan problemlərindən deyil, dünya problemlərindən söz açılacaq: "Başqa ölkədə Azərbaycanın problemlərindən bəhs edən filmlərin nümayişi düzgün olmaz. Bu səbəbdən biz beynəlxalq festivallar üçün xüsusi ssenarilər əsasında filmlər çəkəcəyik. Bununla yanaşı, studiyada milli serialın çəkilməsini də nəzərdə tutmuşuq". O.Fikrətoğlunun sözlərinə görə, artıq studiyada animasiya filmlərinin istehsalına başlanılıb. Studiyanın hazırladığı ilk animasiya filmi "Nyuton" adlanacaq. Studiyanın istehsal etdiyi filmlər televiziya kanallarında nümayiş etdiriləcək.

525-ci qəzet.-21 aaprel.-S.25.