Dədə Qorqud dünyası adlı bina

Ənvər Qarayev tarixi-etnoqrafik binanın qarşısında

ozanın heykəlinin ucaldılmasının tərəfdarıdır

Prezident İlham Əliyevin "Dədə Qorqud heykəli" və "Dədə Qorqud dünyası" tarixi-etnoqrafik kompleksinin yaradılmasına dair sərəncamıyla bağlı rəssamların təklifləri var. Rəssamlar İttifaqı sədrinin müşaviri, Əməkdar rəssam Ənvər Qarayevin sözlərinə görə, kompleksin yaradılması üçün müsabiqə keçirilməsi zərurəti meydana çıxıb. Onun fikrincə,

müsabiqənin qalibinə və ya qaliblərinə bu layihələrin həyata keçirilməsinin həvalə olunması məqsədəuyğun olardı.

Rəssamlar İttifaqının əməkdaşı Dədə Qorqudun simasının əks olunması ilə bağlı bütün türk rəssamları arasında sərgi keçirilməsini də təklif edir. O xatırladır ki, mərhum prezident Heydər Əliyev Azərbaycanda belə layihə həyata keçirirdi. Rəssam deyir ki, yarımçıq qalmış layihəni bütün türk rəssamları arasında davam etdirmək lazımdır. Müsahibim əldə olunan ən yaxşı əsərlərin Dədə Qorqudun tarixi-etnoqrafik kompleksində sərgilənməsini məqsədəuyğun hesab edir.

Ə.Qarayev bu qənaətdədir ki, "Dədə Qorqud dünyası" adlı tarixi-etnoqrafik bina yaradılsa, çox maraqlı olar: "Bina elə qurulmalıdır ki, bura daxil olan insan özünü Dədə Qorqudun zamanına düşdüyü kimi hiss etsin. Mən belə binanın tikilməsini və binanın qarşısında onun heykəlinin ucaldılmasını təklif edərdim. Binanın içi Dədə Qorqud dövrünü xatırlatmalıdır. O dövrün insanlarını əks etdirən manikenlər, çadırlar qurulmalıdır. Dədə Qorqudun heykəlində isə mərdlik, mübarizlik, nur hiss olunmalıdır

Kaspi.-2007.-13 aprel.-S.17.