Mövsümova S.

Bəhlul Danəndə, Molla Nəsrəddin, Abdal Qasım və Ayrım Tağıya heykəl qoyula bilər

Ötən gün Muzey Mərkəzində Mədəniyyət və Turizm Nazirliyi, Karikaturaçı Rəssamlar Birliyi və "Mozalan" satirik kino jumalının dəstəyilə təşkil olunan sərginin açılışı oldu. Sərgi "Mozalan" studiyasının yenidən bərpası münasibətilə start götürdü. Məlum olduğu kimi Mədəniyyət və Turizm Nazirliyini “Mozalan” studiyasının yenidən fəaliyyət göstərməsi və studiyanın güclü istiqamətdə fəaliyyət göstərməsi səbəbindən rəhbərliyi yeniləşdirib.

Mədəniyyət və Turizm naziri Əbülfəs Qarayev qeyd edib ki," Mozalan" satirik kinojurnalı 1971-ci ildə yaradılıb. Kinojurnal sovet hakimiyyəti dövründə fəaliyyət göstərməsinə baxmayaraq, Azərbaycanın ənənələrini qoruyub saxlamağa qadir olub. Sovet dövründən əvvəl də Azərbaycanda Mirzə Ələkbər Sabir, Cəlil Məmmədquluzadə və digər molla nəsrəddinçilərin yetişdiyini xatırladan nazir "Mozalan" satirik studiyasına nöqsanları sağlam tənqidlə göstərməyi tövsiyə edib: "Ayrı-ayrı fərdlərin fəaliyyətində tənqid olunası məqamlar var. Cəmiyyət onlara gülərək baxanda özünü sağalda bilir və həmin nöqsanlardan daha rahat imtina edir. Xırda səhvlərin dərin kök salaraq gələcəkdə daha da böyüməsi pis haldır. Amma tənqid etməklə yanaşı, tövsiyələr vermək qabiliyyəti də olmalıdır".

Nazir deyib ki, yaxın vaxtlarda ölkə başçımız tərəfindən imzalanmış "Kinomatoqrafiyanın inkişafı" proqramının da bu sahənin inkişafına təkan verəcək. "İşlər yalnız başlanğıcdadır"- deyən nazir digər studiyalarımızın da işləməsi üçün maraqlı layihələr hazırlandığını söylədi. Tədbir zamanı nazir Azərbaycan cəmiyyətinə yeni gülüş, yeni baxış və yeni müstəqillik dövrünə aid olan bir sərginin gələcəkdə arzuladığını da diqqətə çatdırdı. Onun sözlərinə görə, dövlət başçısının tapşırığına əsasən, Mədəniyyət və Turizm Nazirliyi bütün memarlıq komplekslərinin təhlilini aparır. Yeni yaradılacaq abidələrin həm zahiri görünüşü, həm mahiyyəti dərindən təhlil edilib, təkliflər verilməlidir. Azərbaycanın görkəmli satiriklərinin, onların əsərlərinin baş qəhrəmanlarının, hətta musiqi alətlərimizin belə abidə və heykəllərinin yaradılması mümkündür: "Biz bu haqda düşünürük. Hazırlanan həmin topluda bu təkliflər nəzərdə tutulur".

Nazir qeyd edib ki, ildə altı-yeddi ölkədə Azərbaycan mədəniyyəti günləri keçiriləcək. "Mədəniyyət günləri" bu il mayda Belarusiya və Moldovada olacaq. Birləşmiş Ərəb Əmirlikləri, Türkiyə və İranda isə həmin tədbirlər bu ilin payızında keçiriləcək.

Karikaturaçı Rəssamlar Birliyinin sədri Bayram Hacızadənin sözlərinə görə, sərgidə 100-ə yaxın rəssamın 200-ə yaxın əsəri nümayiş olunub: "Maraqlı fakt odur ki, sərgidə "Mozalan"ın mövzuları ilə rəssamlarımızın baxışları üst-üstə düşür. Bu da ondan irəli gəlir ki, hədəflərimiz eynidir. Gəmiyyətdə baş verən neqativ hallar, əyintilər və sair nöqsanlara baxışımız, bunlara qarşı mübarizə silahımız eynidir. Burada müxtəlif dövrlərdə məhz “Mozalan”ın ilk buraxılışından bugünkü zaman kəsiyində rəssamlarımızın nümayiş və çap olunan əsərləri göstərilir ki, burada da sovet və son dövrlər əks olunub. Bu yaxınlarda Şəki İcra Hakimiyyəti ilə birlikdə mayın birinci yarısında karikatura sərgisinin nümayişini gözləyirik. Sərgi karikaturanın inkişafına və təbliğinə həsr olunan tədbirdir".

Paritet.- 2007.- 21-23 aprel.- S. 11.