Regionlarda
heykəltəraşlıq və memarlıqla bağlı
görüləcək işlər müzakirə edilib
Xəbər verildiyi kimi, prezident İlham Əliyev
bugünlərdə Azərbaycanda monumental
heykəltəraşlıq abidələri, xatirə-memorial
və memarlıq kompleksləri haqqında sərəncam
imzalayıb. Dünən M.F.Axundov adına Milli Kitabxanada
mədəniyyət və turizm naziri Əbülfəs
Qarayevin iştirakı ilə həmin sərəncamdan
irəli gələn vəzifələrin
müzakirəsinə həsr olunan konfrans keçirildi.
Tədbiri giriş sözüylə açan nazir son
dövrlərdə prezidentin mədəniyyət sahəsinin
inkişafını təmin etmək məqsədilə
imzaladığı sərəncamların
əhəmiyyətini vurğuladı: "Şəhər və
rayonlarımızda böyük sürətlə abadlıq
işləri görülür, ümummilli lider Heydər
Əliyevin xatirəsinin əbədiləşdirilməsi
ilə bağlı tədbirlər həyata keçirilir.
Prezident xüsusi olaraq şəhər və rayonlarda park,
bağ, istirahət guşələrinin hazırkı durumunun
kataloqlaşdırılmasını, Şəhidlər xiyabanlarının
görkəminin yaxşılaşdırılması,
ədəbi-mədəni sahədə tanınmış
korifey sənətkarların büst və xatirə
lövhələrinin, xüsusilə də Dədə Qorqudun
heykəlinin və "Dədə Qorqud dünyası"
tarixi-etnoqrafik kompleksinin yaradılması ilə bağlı
sərəncam verib. Həmin sərəncamdan irəli
gələn işlərin yüksək səviyyədə
görülməsi üçün əlaqədar orqanların
üzərinə böyük məsuliyyət
düşür". Prezident Aparatının məsul
işçisi Tahir Budaqov sözügedən
sərəncamın Azərbaycanın mədəni
inkişafına böyük töhfələr
verəcəyinə əminliyini ifadə etdi. Sonda
respublikanın müxtəlif regionlarından gələn
nümayəndələrə söz verildi . Onlar bu
sərəncamın onların qarşısına ciddi
vəzifələr qoyduğunu dərk etdiklərini və
nəzərdə tutulan işlərin öhdəsindən
layiqincə gəlməyə
çalışacaqlarını bildirdilər.
525-ci qəzet.-2007.-11 aprel.-S.7.