Fəxriyyə Xələfova münsiflər heyətinin sədri oldu

Modelyer xanım Moskvada keçiriləcək beynəlxalq müsabiqəyə qatılıb

Modelyer Fəxriyyə Xələfova Moskva şəhərinə səfərə çıxıb. Səfərin məqsədi orada keçiriləcək Milli geyimlərin XIII Beynəlxalq Yüksək Moda Müsabiqəsində iştirak etməkdir. Qeyd edək ki, Fəxriyyə xanım bu müsabiqə ilk dəfə 2000-ci ildə Almatı şəhərində keçirilərkən iştirak edib. 2003-cü ilin may ayından isə modelyer sözügedən müsabiqənin münsiflər heyətinin üzvüdür. Müsabiqə təşkilatçıların qərarı ilə Fəxriyyə xanım aprelin 13-15-i Moskva Hökumətinin Böyük zalında keçiriləcək XIII Beynəlxalq Müsabiqədə münsiflər heyətinin sədri qismində iştirak edəcək. Eyni zamanda, Fəxriyyə xanım müsabiqənin "Qızıl qayçı" xüsusi mükafatı ilə təltif olunacaq. Mayın 15-i isə müsabiqənin qala nümayişində Fəxriyyə xanımın "Cazibə" adlanan kolleksiyası nümayiş etdiriləcək. Nəzərinizə çatdıraq ki, XIII Beynəlxalq Müsabiqəyə dünyanın 8 ölkəsi, eyni zamanda Rusiyanın Pyatiqorsk, Abakan, Samara, Ufa, Maqnitoqorsk, Altay, Krasnodar, Çerkessk, Nalçik, Perm və başqa regionlarının da iştirakı, eyni zamanda, ictimai təşkilatların və Moskva milli-mədəni muxtariyyətindən 20-yə yaxın kolleksiya təqdim olunacaq.

Kaspi.-2007.-14-16 aprel.-S.20.