"Əlvida, cənub şəhəri" filmi İstanbulda uğur qazanıb

AzərTAc xəbər verir ki, İstanbul Mədəniyyət və İncəsənət Fondunun təşkil etdiyi və martın 31-də başlanmış 26-cı Beynəlxalq İstanbul film festivalına yekun vurulub. Festivalın ən çox bəyənilən filmlərindən biri "Qafqazlardan Aralıq dənizinədək" bölməsində nümayiş etdirilən və 2006-cı ildə ən yaxşı film və ən yaxşı kino musiqisi mükafatları almış, habelə bu il Berlin Kino Festivalında da yer tutmuş "Əlvida, cənub şəhəri" adlı Azərbaycan filmi olub.

Quruluşçu rejissoru Oleq Səfərəliyev olan və baş rolları aktyorlar Fəxrəddin Manafov, Teymur Bədəlbəylinin ifa etdikləri bu film ictimai-siyasi dəyişikliklərin insan taleyində buraxdığı izlərdən bəhs edir. Dağlıq Qarabağda baş verən hadisələr və bu proseslərin fonunda yaşanan insanlıq faciəsi filmin ana xəttini təşkil edir. Festivalda dünyanın bir çox ölkələrinin kinematoqraflarını son illərdə müvəffəqiyyət qazanmış ən yaxşı əsərləri nümayiş olunub.

Palitra.- 2007.- 17 aprel.- S. 15.