Mükərrəmoğlu M.

Cavad xan filmi çəkilir

Azərbaycan tarixinin ən şanlı səhifələrindən biri sayılan gəncəli Cavad xanın taleyi və qəhrəmanlığından bəhs edən “Cavad xan” filminin çəkilişlərinə start verildi. Film dövlət sifarişi əsasında çəkilir. Belə ki, Azərbaycan Respublikası Prezidentinin kino sənətinin inkişafı ilə bağlı imzaladığı 23 fevral 2007-ci il tarixli sərəncamda tarixi filmlərin ekranlaşdırılmasını nəzərdə tutan xüsusi bənd filmin ərsəyə gəlməsinə böyük təkan verib.
Qeyd edək ki, Mədəniyyət və Turizm Nazirliyinin qayğısı sayəsində çəkilən filmə xarici ölkə mütəxəssisləri də cəlb olunub.
Filmdə hadisələr əsasən Gəncədə cərəyan edir və ona görə də çəkiliş qrupu artıq Gəncə şəhərindədir.
Ötən həftə çəkilişlər 1803-cü ilin dekabrında gəncəlilərin rus qoşunları ilə ilk dəfə toqquşduğu tarixi ərazidə – Xanlar rayonundakı Quru Qobu adlanan yerdə aparıldı. Artıq bir neçə kadrın çəkilişləri başa çatıb. Filmdə çətin tryukları kaskadyorlar qrupunun yerinə yetirməsi nəzərdə tutulsa da, bir çox aktyorlar, o cümlədən baş rolun ifaçısı Nurəddin Mehdixanlı bütün tryuklarda bilavasitə özü çəkilir.
Xatırladaq ki, filmin ssenari müəllifi xalq şairi Sabir Rüstəmxanlı, quruluşçu rejissoru Rövşən Almuradlıdır. Cavad xan obrazını Azərbaycanın xalq artisti Nurədddin Mehdixanlı canlandırır. Gürcü çariçası Dariya rolunda Amalya Pənahova, general Sisianov rolunda isə Ramiz Novruz çəkilirlər.
Yaxın günlərdə Zaqatala-Balakən ərazisində total döyüş səhnələrinin çəkilişləri nəzərdə tutulur. Daha sonra isə Bakıda, “Azərbaycanfilm” kinostudiyasının pavilyonlarında çəkilişlər davam etdiriləcək.
Qeyd edək ki, hazırda Gəncədəki çəkilişlərlə paralel olaraq pavilyonların hazırlanması prosesi gedir və pavilyonların çəkilişlərə hazır vəziyyətə gətirilməsi üçün tədbirlər görülür. Filmin informasiya mərkəzindən bildirdilər ki, əgər filmin istehsalı bu templə davam etsə, yaxın bir neçə ay ərzində çəkilişləri tamamlamaq mümkün olacaq.

Xalq qəzeti.-2007.-22 aprel.-S.8.