Azərbaycan Beynəlxalq
Kino Məktəbinə tələbə qəbulu
yekunlaşıb
Məktəbə daxil
olanlar kinoşünas, rejissor, dramaturq və prodüser
ixtisasına yiyələnə biləcəklər
Ötən gün Kinematoqrafçılar
İttifaqının rəhbərliyi
Azərbaycan Beynəlxalq
Kino Məktəbinin yaradılması ilə bağlı mətbuat konfransı keçirdi.
"İbRus" Teatrında
keçirilən tədbirdə
çıxış edən
Kinematoqrafçılar İttifaqının
katibi Cəmil Quliyev sözügedən məktəbin yaranması
haqqında
ətraflı məlumat
verdi: "Azərbaycan
Beynəlxalq Kino Məktəbinin həm təşəbbüskarı, həm
də yaradıcısı
Rüstəm İbrahimbəyovdur.
Məqsəd beynəlxalq
tələblərə cavab
verən kino mütəxəssisləri hazırlamaqdır.
Bu məktəbə qəbul imtahanı 3 mərhələdə aparılıb.
Məktəbə daxil
olmaq üçün
müraciət edən
306 gəncin anketi nəzərdən keçirilərək
onlardan 108-i 2-ci tura buraxılıb. Bu sınaqdan keçən
29 nəfərə 4 ixtisas
– kinoşünas, rejissor,
dramaturq və prodüserlik üzrə ali kurslar tədris
olunacaq. Məktəbin
filmotekası, kinozalı
var. Buraya yalnız ali təhsili olanlar qəbul edilib və daxil olan
tələbələr arasında
qeyri-kino ixtisaslı şəxslər daha çoxdur. Dərsləri
xarici mütəxəssislər
tədris edəcək
və hər ixtisas üzrə emalatxana fəaliyyət göstərəcək". Məktəbin Moskva Ali Rejissor
Kurslarının nəzdində
formalaşdığını qeyd edən C.Quliyev burada tədrisin 2 illik proqram çərçivəsində
nəzərdə tutulduğunu
və məzunlara beynəlxalq statuslu sertifikat veriləcəyini
vurğuladı. İttifaqın
digər katibi Abbas Əliyev təşkilati və maliyyə məsələləri barəsində danışdı: "Prezident
İlham Əliyevin milli kinomuzun inkişafı ilə bağlı verdiyi sərəncamı əldə
rəhbər tutaraq müvafiq təklif irəli sürdük. Mədəniyyət və
Turizm Nazirliyi bizim təklifimizi bəyənərək Nazirlər
Kabinetinə təqdim
edib. İlk mərhələdə bunun
üçün 200 min
yeni manat vəsait veriləcəyi nəzərdə tutulub. Bu məbləğin gələcəkdə artırılacağı
gözlənilir". Jurnalistlərin suallarını cavablandıran
C.Quliyev Azərbaycan və rus dillərini
mükəmməl bilənlərə
seçim zamanı üstünlük verildiyini,
təhsilin Azərbaycan
vətəndaşları üçün
ödənişsiz, əcnəbilər
üçün ödənişli
olduğunu açıqladı.
525-ci
qəzet.-2007.-10 aprel.-S.7.