Turanə

ABŞ rəssamı Azərbaycanlı həmkarları ilə görüşüb

Dövlət Akademik Milli Dram Teatrında Amerika teatr rəssamı Bredli Helm və Azərbaycan teatr rəssamları xalq rəssamı Nazim Böykişiyev, əməkdar rəssam İsmayıl Məmmədov, Lətifə Quluzadə, Elnur Babayev, Valeh Məmmədov arasında görüş keçirilib. Xarici qonaq müasir Amerika teatrında mövcud meyl və tendensiyalar, problem və nailiyyətlər barədə məlumat verib. Bredli Helm həmkarlarını sənət əsərlərilə də tanış edib. İnteraktiv sual-cavab tərzdə keçirilən bu görüşdə qonaq Azərbaycan mədəniyyəti və incəsənəti ilə yaxın tanış olduğunu və Azərbaycan sənət peşəkarlığının yüksək səviyyədə olduğunu söyləyib.

Akademik Milli Dram Teatrı ABŞ səfirliyinə birgə teatr layihəsi təşəbbüsülə müraciət edib. Məqsəd, görkəmli amerikan dramaturqu Artur Millerin “Körpüdən mənzərə” pyesi əsasında tamaşanın Milli teatrımızın səhnəsində hazırlanması üçün, beynəlxalq quruluşçu heyətin yaranmasıdır. Qeyd edək ki, Bredli Helm ilk dəfə olaraq “Azərbaycan-Amerikan teatr təşəbbüsü” layihəsi ilə əlaqədar Bakıda işgüzar səfərdədir. Layihə Akademik Milli Dram Teatrının səhnəsində “Körpüdən mənzərə” tamaşasının qoyuluşunu nəzərdə tutur. Tamaşanın quruluşçu rejissoru - xalq artisti, teatrın baş rejisssoru Mərahim Fərzəlibəyov və quruluşçu rəssam Bredli Helmdir. Layihə Azərbaycan Mədəniyyət və Turizm Nazirliyi və ABŞ səfirliyinin dəstəyi ilə reallaşacaq. Səhnə əsərinin premyerası iyun ayına planlaşdırılır.

Yeni Azərbaycan.-2007.-14 aprel.-S.12.