Əlibəyli G.

Dahi bəstəkara həsr edilmiş miniatür kitab çap olunmuşdur

Bu günlərdə Mədəniyyət və Turizm Nazirliyinin və "Kitab" Cəmiyyətinin xəttilə nəfis şəkildə yeni miniatür kitab çapdan çıxmışdır. Kitab dahi bəstəkar Qara Əbülfəz oğlu Qarayevə həsr edilmişdir.
Miniatür nəşrdə dünya şöhrətli bəstəkarın tədqiqatçısı, məşhur pedaqoq və musiqişünas, professor Lüdmila Karagiçevanın geniş və maraqlı kitabından seçmə parçalar dərc edilmişdir.
L.V.Karagiçeva 1923-cü ildən 1982-ci ilə qədər Bakıda yaşamışdır və onun musiqişünas-alim və pedaqoq kimi Azərbaycan musiqi mədəniyyətində son dərəcə böyük və misilsiz xidmətləri olmuşdur. Qara Qarayevin yaradıcılığının təhlili və təbliği L.Karagiçevanın tədqiqatlarının əsasını təşkil etmişdir. O, 10-a qədər fundamental kitab və monoqrafiya yazmış, esse və məqalə toplularını bəstəkarın ölməz musiqisinə həsr etmişdir.
L.Karagiçeva ilk dəfə Qara Qarayevin musiqisinin dünya mədəniyyəti kontekstində təhlilini aparmış və bu musiqiyə son dərəcə yüksək qiymət vermişdir. "Qara Qarayev - XX əsrin görkəmli bəstəkarı" kitabında müəllif bəstəkarın həyatının, şəxsiyyətinin, musiqi yaradıcılığının köklərini, təkrarsız dərin mənasını açmağa nail olmuş və müasirlərinə bu mürəkkəb musiqinin ciddi fəlsəfi sirlərini ustalıqla açıb göstərmişdır. Xüsusi qeyd etmək lazımdır ki, kitab gözəl publisistik, bədii üslub və formada yazılmışdır.
L.V.Karagiçeva Bakıdan Moskvaya köçəndən sonra da (1982-ci il) Azərbaycan musiqisi və xüsusilə Qara Qarayevin yaradıcılığı ilə məşğul olmaqda davam etmişdir.
Özəl Miniatür kitab muzeyinin yaradıcısı və təsisçisi, əməkdar mədəniyyət işçisi Zərifə Salahova L.Karagiçevanın Qara Qarayev haqqında yazdığı son monoqrafiyası ilə tanış olmuş və buradan ən maraqlı hissə və parçaları seçib tərcümə üçün istedadlı yazıçı və tərcüməçi Siyavuş Məmmədzadəyə təqdim etmişdir.
Qara Qarayevə həsr edilmiş bu miniatür kitab iki dildə - həm Azərbaycan, həm də rus dillərində "Kitab" Cəmiyyətinin nəşriyyatında çap olunmuşdur. Miniatür kitabın formatı 47 x 45 mm-dən ibarətdir. Buraya 380 səhifəlik mətn, 19 şəkil yerləşdirilib. Kitabın superçildini Qara Qarayevin gözəl, dərin mənalı portreti bəzəyir. Bu portret xalq rəssamı, akademik Tahir Salahovun fırçasının məhsuludur. Sual oluna bilər: niyə məhz Tahir Salahovun əsəri burada yerləşdirilib?
Məsələ bundadır ki, L.Karagiçevanın monoqrafiyası məhz bu portretin ona necə dərin təsir etməsi haqqında söhbətlə başlayır. Sən demə, kitabın müəllifi L.V.Karagiçeva məhz Tahir Salahovun ustalıqla çəkilmiş portretindən bəhrələnərək ilham almış və fundamental tədqiqat üzərində işləməyə başlamışdır.
Qara Qarayevin portreti 1961-ci ildə Moskvada Manejdə nümayiş etdirilmişdir.
Miniatür kitab muzeyinin təsisçisi və yaradıcısı Zərifə Salahova deyir: "Hazırda respublika ictimaiyyəti bəstəkarın 90 illik yubileyinə hazırlıq görür. Demək olar ki, bu miniatür kitab yubileyə hazırlığın ilk addımıdır.
Mən bu işləri Mədəniyyət və Turizm Nazirliyinin mənəvi və maddi dəstəyi, həm də qəlbimin sifarişiylə görmüşəm. İnanıram ki, bu kitab milli mədəniyyətimizn dahilərinə həsr olunmuş miniatür kitablar sırasında layiqli yer tutacaq".

Azərbaycan.-2007.-6 aprel.-S.7.