Hacıbəyov Ü.

Səs gəlir

Kefimiz çox kökdür, qovun-qarpız da Allaha şükür çıxıb. Üzümün də ləzzətli vaxtıdır. Nə qədər istəyirsən ye, iç. Bu orucluq da bir tərəfdən gəlir, amma bir az hava istidir. Və bir də bizim dəryanın o yan tərəfinədək qulağımıza bir para səslər gəlir. Deyirlər ki, İran tərəfdə bilmirəm dava var, nə var. Bir yandan da günümüz axşama kimi palan dallarında evlərin kölgəsində bitlənən həmşəhrilər deyəndə ki, a kişi evinizdə it ki ölməyib? Burda nə gəzirsiniz? Deyirlər: “Vətən çox şuluqdur, baş götürüb qaçmışıq”.


Avstraliyada çıxan qəzetlərin yazdığına görə, Mədəlibəy (Məmmədəli şah — T.A.) gəlib bizim yanımızdan adlayıb İrana tərəf aparıb, amma and olsun Purişkeviçin gözəl başına ki, bu işdə bizim əsla xəbərimiz olmayıb. Görünür ki, zalım aeroplan ilə uçub Rusiyadan keçib. İndi bu insanlara deyən gərək, ay canım! Kişi qayıdıb öz sevgili Vətəninə gəlib, daha bu nə dava, qalmaqalbazlıqdı başlamısınız?
Vallah heç başa düşə bilmirəm. Hələ məzə burasındadır ki, bizim “Baku” qəzeti başlayıb ki: “Gərək Qafqaz erməniləri İrana addıyıb getsinlər və orada erməni qardaşlarına kömək eləsinlər ki, olar da Mədəliynən dava edib canlarını məşrutə yolunda qurban eləsinlər”. A kişi! Qoysan yəni hər kəs öz yerində oturub, otursun.
***
Bir tərəfdən də qulağıma dəydi ki, İstanbul yanıbdımı nədi? İndi Menşikov cənabları öz qəzetəsində yazır ki: “Biz Rusiya camaatına lazımdır ki, İstanbulun əhalisi üçün bir az pul yığıb yolluyaq. Nə ki, osmanlılar bizim Türküstanda olan zəlzələyə kömək ediblər”. Menşikovun bu təklifini oxuyan kimi bizim “İşıq”ımız da buradan Menşikova teleqram göndərib xəbər aldı ki: “Gərək, aya, biz də buradan istanbullular üçün pul yığa bilərikmi?” Bu işə cənab Menşikovun acığı tutmazmı? Haman o günü gözümüzün “İşığ”ına Menşikov teleqraf ilə belə cavab verdi: “Əziz yoldaş!” kefini pozma, hər nə istəyirsən elə!"Bu cavabdan sora, bizim şəhərdə də “fəxri-millətlərimiz” İstanbul əhalisindən ötrü pul yığmağa başladılar. Bu bir neçə gündə çox pul yığılıb və genə yığılır. Bu yaxınlarda İstanbula göndəriləcək ianələr “İşığ”ın qaranlıq otağında qəbul olunur.

Lal uşaq
“Molla Nəsrəddin” jurnalı.
11 avqust, 1911-ci il N 29

Xalq qəzeti.-2007.-13 aprel.-S.7.