Xatirələrdən boylanan bəstəkar

Dahi Azərbaycan bəstəkarı Üzeyir Hacıbəyovun yorulmaz və cəfakeş tədqiqatçılarından olan Səadət Qarabağlı milli operamızın banisinin yaradıcılığı ilə bağlı maraqlı əsərlər yazmışdır. Üzeyir Hacıbəyovun publisistikası, felyetonları, müasirləri və ailəsi haqqında mükəmməl yazıların müəllifi olan Səadət xanım ötən illərdə hazırlanmış "Üzeyir Hacıbəyov ensiklopediyası"nın müəlliflərindən biridir.
Daim axtarışda olan Səadət Qarabağlı dahi bəstəkarın anadan olmasının 120 illiyinə hədiyyə olaraq vaxtilə onu yaxından tanıyan insanların lent yazılarını toplayaraq müxtəlif disklər (SD) hazırlamışdır. Jurnalist Gülbəniz Hüseynova ilə birlikdə hazırlanan bu maraqlı layihələrdə bəstəkarlardan Ədilə Hüseynzadə, Hökümə Nəcəfova, Cövdət Hacıyev, Ruqiyyə Rzayeva, Hacı Xanməmmədov, Məmməd Cavadov, Şəfiqə Axundovanın xatirələrindən ibarət üç disk (SD) ötən il işıq üzü görmüşdür. Unudulmaz bəstəkarımızın tələbəsi olmuş bu sənətkarların çıxışları ilk dəfə Azərbaycan radiosunda səslənmişdir. Üzeyir bəyin sevimli tələbələrindən biri olmuş Ədilə Hüseynzadə xatirələrində öz duyğularını belə dilə gətirib: "E O, bir ata kimi saysız-hesabsız Azərbaycan balalarının əlindən tutub, onlara musiqi savadı verib, xalqmızın tükənməz musiqi xəzinəsinin incilərindən istifadə etməyi öyrədib".
Müəlliflər öz xeyirxah işlərini davam etdirərək "Ustadı xatırlarkənE" adlı növbəti kompakt diski (SD) Üzeyir bəyi sevənlərə təqdim etmişlər. Bu disklərdə də Üzeyir bəyin tələbələri öz müəllimləri haqqında maraqlı xatirələr söyləyərək onun həm şəxsiyyət, həm də bəstəkar kimi məziyyətlərindən, bənzərsiz xasiyyətindən, insanlara münasibətindən söz açmışlar.
Səadət Qarabağlı söyləyir ki, Üzeyir Hacıbəyovla bağlı görüləcək işlər çoxdur. Ustadın ötən əsrin əvvəllərində nəşr edilmiş müxtəlif qəzet və jurnallarda xeyli məqaləsi, felyetonu dərc edilmişdir. Təəssüf ki, Üzeyir Hacıbəyovun bütün məqalələri bu günə kimi toplanıb nəşr edilməmişdir. Halbuki, Üzeyir bəy təkcə bəstəkar deyildi, həm də böyük jurnalist və felyetonçu idi. O, elə əsərlərə imza atmışdı ki, bu gün də öz aktuallığını itirməyib. Bu səbəbdən də Üzeyir Hacıbəyovun əbədi irsinin tam nəşr edilməsinə ehtiyac var.

Azərbaycan.-2007.-8 aprel.-S.6.