Vətənə ruhumu təzələməyə gəlirəm

Çingiz Sadıxov: "Uzaqda yaşamağımla bura daha da bağlanmışam"

13 ildən artıqdır ki, azərbaycanlı pianoçu Çingiz Sadıxov fəaliyyətini Amerika Birləşmiş Ştatlarında davam etdirir. Apreldə 78 yaşını tamamlayan həmyerlimiz səhhətindən gileylənir. Dediyinə görə, yüksək təzyiq və ürəyindəki narahatçılıqdan əziyyət çəkir. Pianoçu hərdən ruhunu təzələmək üçün vətənə gəlir. Sonuncu səfərinə isə o, həyat yoldaşı ilə Rusiyadan başlayıb. Deyir ki, dostlarının məsləhəti ilə hər ikisi orada müalicə kursu keçib: "Keçən ay ABŞ-da Azərbaycan klassik musiqi əsərlərindən ibarət 3-cü CD-im işıq üzü görüb. Bu disk mənə dostlarımdan Bülbül, Rəşid Behbudov və Müslüm Maqomayevi xatırlatdı. Uzaqda yaşamağımla vətənə ruhən bir az da bağlanmışam. Kənardan vətənə boylanıb baxanda, onun necə doğma və əziz olduğunu görürəm". 78 yaşlı pianoçunu bu gün alətin arxasında saxlayan yeganə səbəb vətən sevgisidir: "Amerikalılar pianonun ifasını çox sevirlər. Tez-tez konsertlərim təşkil olunur və böyük tamaşaçı izdihamı görürəm. Onlar konsertə ailəlikcə gəlirlər. 5 yaşından tutmuş 70-80 yaşına qədər tamaşaçı görürəm. Hamısı eyni intellektə malikdirlər. Sakitcə musiqini dinləyirlər".

Ç.Sadıxov övladlarının özü ilə yaşadığını və onların da musiqiçi olduğunu dedi. Bildirdi ki, böyük qızı pianoçu, kiçiyi isə skripkaçıdır. Hər ikisi Kaliforniyada təhsil alıblar. Onun sözlərinə görə, amerikalılar uşaqlarını lap kiçik yaşlarından musiqiyə cəlb edirlər. Hər ailədə mütləq bir musiqiçi yetişir. Bu, ilk növbədə ölkənin mədəniyyətinin inkişafına xidmət edir: "Ailəlikcə öz musiqimizin təbliğinə səy göstəririk. Düzdür, övladlarım Azərbaycanda az-az olurlar. Amma ölkənin tarixi haqqında onları bilgiləndirmək mənim üzərimə düşür. Bu mənada özümü müsbət qiymətləndirirəm. Hətta qızlarımın yetirmələri Azərbaycanın klassik musiqisi və bəstəkarlarının əsərləri haqqında müəyyən bilgiyə malikdirlər. Konsertlərimizdə mütləq Üzeyir Hacıbəyov, Qara Qarayev, Fikrət Əmirovun və b. əsərlərəmütləq yer ayırırıq. Son illər həmin konsertlərin təşkilində

diasporumuzun xidmətləri olub. İki gün öncə ABŞ-da verdiyim konsertləri haq-hesab edirdim. Gəldiyim qənaətə görə, 13 il ərzində 32 konsertim təşkil olunub. Səhhətimlə bağlı bir neçəsindən imtina etmişəm".

Səfərlərinin yalnız istirahət xarakteri daşımadığını söyləyən Ç.Sadıxov dedi ki, Fidan və Xuraman Qasımova bacıları ilə onu yaradıcılıq əməkdaşlığı birləşdirir. Qeyd edək ki, pianoçunun sonuncu diskinə vokal ifaçılarının Ç.Sadıxovun müşayiəti ilə bir əsəri daxil edilib: "Səfərlərimdə digər musiqiçilərlə də mübadilələrim olur. Məsələn, Fərhad Bədəlbəyli və Murad Adıgözəlzadə ilə həmişə fəxr edirəm. Musiqiçi 4-5 illik musiqi təhsili ilə kifayətlənməməlidir. Fərhad Bədəlbəyli konservatoriyanın rektoru olmağına baxmayaraq, bu gün də axtarışdadır, öyrənir. Mən 18 il musiqi təhsili almışam - orta musiqi məktəbi, konservatoriya, magistatura, aspirantura və təkmilləşdirmə kursları. Ölkənin iqtisadi və sosial vəziyyəti gənclərin mövqeyini bir az başqa istiqamətə yönəldib. Amma insan hər hansı vəziyyətdə olursa olsun, bir amal uğrunda mübarizə aparmalıdır. Əgər sənin çətin günə dözümün yoxdursa, yaxşı musiqiçi ola bilməyəcəksən. Zaman öz süzgəcindən pislə yaxşını keçirib, onları bir-birindən ayırır. Son illər Azərbaycanda müsabiqələrin keçirilməsi, dövlətin qayğısı yaxşıların sayını çoxaldıb. Bu məni sevindirir".

Kaspi.-2007.-24 aprel.-S.14.