Muğamlarımız Livinqstonun səhnəsində

Qədim Şərq muğam qrupunun ifasında

Azərbaycanın Los-Ancelesdəki baş konsulluğunun məlumatına görə, aprelin 18-də "Qədim Şərq" muğam qrupu - dəf ifaçısı Mahmud Saleh, tarzən Elman Sadıqov və kamançada Elnur Mikayılovun müşayiəti ilə Azərbaycan Milli Konservatoriyasının tələbəsi Qoçaq Əsgərovun ABŞ-ın Livinqston şəhərində konsert proqramı təqdim edilib.

Məlumatda deyilir ki, musiqili proqramı baş konsul Elin Süleymanov və "Azərbaycan gündəliyi" kitabının müəllifi Tomas Qolts təşkil edib. Ötən əsrin 90-cı illərdə Azərbaycanda yurnalist fəaliyyəti ilə məşğul olan yurnalist Qarabağ müharibəsi illərini xatırlayaraq belə deyib: "Mən Azərbaycanda çox ağır günlər keçirmişəm. Hər gün ölümlə qarşılaşırdım. Ermənilərin başladığı müharibə nəticəsində 35 mindən çox azərbaycanlı həlak olmuşdu".

Azərbaycanın zəngin mədəniyyətə, incəsənətə malik olduğunu deyən T.Qolts muğamla yaxından tanışlığını və bu qədim milli sənətin dünya musiqi yanrları sırasında xüsusi yeri olduğunu vurğulayıb: "Muğamın yaşı min illəri ötüb keçir. Azərbaycan xalqının bu böyük sərvətinin özünəməxsusluğu, incəliyi var. Bu üzdən hesab etdim ki, Azərbaycan muğamları Livinqston əhalisi üçün maraqlı ola bilər və ehtimalımda yanılmadım. Tamaşaçılar muğam proqramını böyük maraqla izlədilər və sənətçini dəfələrlə səhnəyə qaytardılar".

Qrupun bundan öncə Amerikanın Çikaqo vəLos-Anceles şəhərlərində konsert verdiyini söyləyən baş konsul E.Süleymanov Livinqstondakı proqramın daha maraqlı keçdiyini söyləyib. Qrupun ABŞ-da Qərb və Şərq mədəniyyətləri arasındaəlaqə yaratdığını deyən E.Süleymanov bildirib ki, onların davamlı çıxışlarını təşkil etmək üçün müəyyən addımlar atılacaq.

Kaspi.-2007.-25 aprel.-S.17.