Azərbaycan-Rusiya mədəni əlaqələri genişlənir

AzərTAc xəbər verir ki, Mədəniyyət və Turizm naziri Əbülfəs Qarayev aprelin 20-də ölkəmizdə işgüzar səfərdə olan Rusiya Federal Mədəniyyət və Kinematoqrafiya Agentliyinin başçısı Mixail Şvıdkoy ilə görüşmüşdür.
Ə.Qarayev bildirmişdir ki, son vaxtlar ölkələrimiz arasında mədəni əlaqələr daha intensiv inkişaf edir. Bu günlərdə Moskvada Azərbaycan mədəniyyəti günləri başa çatmışdır, indi isə mayın 5-6-da Bakıda keçiriləcək Kulturoloqlar forumuna hazırlıq gedir.
Nazir demişdir: "Tədbirə hazırlıq çərçivəsində bir çox məsələləri - Rusiya qiraətçilərinin çıxışlarını, Bakıda Moskva teatrlarının qastrol səfərlərini, habelə RF regionlarında Azərbaycan mədəniyyəti günlərinin təşkilini müzakirə etməliyik. Bununla əlaqədar, "Oqonyok" jurnalının redaktoru Viktor Loşak və Kulturologiya İnstitutunun direktoru Kirill Razloqov hazırda Bakıdadırlar".
Mixail Şvıdkoy demişdir: "Müntəzəm görüşlərimiz obyektiv tələbatdır. Mədəni əlaqələrimizin həcmi artır ki, bu da aydın düzəlişlər tələb edir. Moskvada Azərbaycan mədəniyyəti günləri böyük maraqla qarşılanmış, Dövlət Pantomim Teatrının çıxışları müsbət əks-səda doğurmuşdur.
İlk dəfədir Rusiya-Azərbaycan festivalları haqqında danışıqlar gedir, yazıçı və şairlərimizin iştirakı ilə "dəyirmi masa"ların təşkili planlaşdırılır. Azərbaycan yazıçı və şairlərinin yaşlı nəslini Rusiyada yaxşı tanıyırlar, lakin Azərbaycanın müasir poeziyasını və nəsrini də təqdim etmək lazımdır".
Görüşdə müştərək kino layihələrindən, tələbələrin staj keçmələrindən də söhbət getmişdir.
Bildirilmişdir ki, bu ilin oktyabrında Bakıda Moskva mədəniyyəti günləri keçiriləcəkdir.
Görüşdən sonra M.Şvıdkoy jurnalistlərin suallarına cavab vermişdir

Azərbaycan.-2007.-21 aprel.-S.7.