Rüstəm Z.

Azərbaycan bəstəkarlarının yeni toplusu

Qara Qarayev, Cövdət Hacıyev, Niyazi, Soltan Hacıbəyovun eşidilməmiş əsərləri diskə daxil edilib

Azərbaycan bəstəkarlarının hələ səsləndirilməmiş 20-dən çox fortepiano əsərinin yazıldığı disk bu günlərdə işıq üzü görüb. Qeyd edək ki, Musiqi Mədəniyyəti Muzeyi əməkdaşlarının Qara Qarayev, Cövdət Hacıyev, Niyazi, Soltan Hacıbəyov, Polad Bülbüloğlu və Fərhad Bədəlbəylinin arxivlərdəki əsərlərinin notlarının əlyazmaları da indiyədək dərc edilməmişdi.
Muzey əməkdaşının məlumatına görə, Mədəniyyət və Turizm Nazirliyinin dəstəyi ilə həmin əlyazmalar iki variantlı məcmuədə çapdan çıxıb. Məlumatda eyni zamanda deyilir ki, musiqi əsərləri diskə pianoçu Ülviyyə Hacıbəyovanın ifasında yazılıb.
Muzey əməkdaşları bu diskin Azərbaycanda və onun hüdudlarından kənarda musiqisevərlərin həmvətənlərimizin zəngin yaradıcılığı barədə təsəvvürlərini daha da genişləndirəcəklərini qeyd etdilər.
Xəbərdə deyilir ki, topluya Qara Qarayevin hələ 1940-ci ildə bəstələdiyi birhissəli sonatinası, Azərbaycan Dram Teatrının səhnəsində oynanılan "Antoni və Kleopatra" əsərinə yazdığı musiqi, Dmitri Şostakoviçin istedadlı tələbəsi Cövdət Hacıyevin tələbəlik illərində yazdığı 4 perlüdü, Soltan Hacıbəyovun əsərləri daxildir. Eyni zamanda maestro Niyazinin 17-18 yaşlarında bəstələdiyi "Etüd", "Skertso", "Prelüd", "Rəqs" və digər fortepiano əsərləri də diskə daxil edilib.
Həmin topluda Polad Bülbüloğlunun "Skertso", Fərhad Bədəlbəylinin birinci kurs tələbəsi olarkən maestro Niyaziyə həsr etdiyi "Prelüd"ü də əksini tapıb.

Ayna.- 2007.- 21 aprel.- S. 21.