Taştemir T.

Naxçıvan bəstəkarları hesabat verdilər

Cəlil Məmmədquluzadə adına Naxçıvan Dövlət Musiqili Dram Teatrında Muxtar Respublika (MR) Bəstəkarlar Təşkilatının III hesabat konserti keçirilib.

Hesabat konsertində çıxış edən Naxçıvan MR Bəstəkarlar Təşkilatının sədri Şəmsəddin Qasımov rəhbərlik etdiyi qurumun musiqi mədəniyyətimizə verdiyi töhfələrdən, eləcə də Muxtar Respublikanın ictimai-mədəni həyatındakı rolundan söz açıb. Naxçıvan bəstəkarlarının qazandıqları uğurları yüksək dəyərləndirən Azərbaycan Bəstəkarlar İttifaqının katibi, Əməkdar incəsənət xadimi Ramiz Zöhrabov bildirib ki, bu, hər şeydən əvvəl, son illər mədəniyyət və incəsənətimizə artırılan dövlət qayğısının təzahürüdür. Çıxışının sonunda o, 3 bəstəkara - Yeganə Əsədova, Günay Məmmədova və Bənövşə Rzayevaya Azərbaycan Bəstəkarlar İttifaqının üzvlük vəsiqələrini təqdim edib. Tədbiri Azərbaycan Respublikası Bəstəkarlar İttifaqı və Naxçıvan Muxtar Respublikası Bəstəkarlar Təşkilatının birgə hesabatı kimi dəyərləndirən Ali Məclisin Sədri Vasif Talıbov bundan sonra da Naxçıvanda mədəniyyət və incəsənətin həmişə diqqət mərkəzində olacağını bildirib.

Qeyd edək ki, Naxçıvan Dövlət Filarmoniyasının Xalq Çalğı Alətləri Orkestrinin ifasında səslənən üç hissədən ibarət "Naxçıvan eskizləri" ilə başlanan hesabat konsertində ayrı-ayrı janrlarda musiqi nömrələri təqdim edilib. Tədbirdə Azərbaycan Milli Konservatoriyasının aspirantı Svetlana Əhmədovanın fortepianoda ifa etdiyi "Variasiya", Cahangir Qurbanovun skripkada ifa etdiyi "Mömünə Xatın" əsərləri daha çox alqışlarla müşayiət olunub.

Zaman.- 2007.- 19-20 aprel.- S. 8.