Lalə

Sevda Ələkbərzadə avropalı oldu

Bu yaxınlarda “Şəbi Hicran” layihəsini təqdim edən müğənni Sevda Ələkbərzadə qarşısına sənətində daha böyük uğurlar əldə etməyi məqsəd qoyub. Belə ki, Sevda artıq ilk addım olaraq Almaniyanın “Network Medien” musiqi şirkəti ilə müqavilə imzalayıb. Bunu sənətçi özü dünən Nyatt Regence otelində media nümayəndələri ilə görüşündə açıqlayıb.

Sevda Ələkbərzadə bildirib ki, müavilə ötən gün şirkətin müdiri Kristian Şolts ilə imzalanaıb. Xatırladaq ki, 1980-ci ildən fəaliyyətdə olan “Network Medien” şirkəti dünyanın bir çox tanınmış sənətçilərinin albomlarını buraxır. Şirkət tərəfindən musiqi bazarına çıxarılan albomlar dünyanın 35-dən artıq ölkəsində satılır. Üç il ərzində şirkətlə əməkdaşlıq edəcəyini söyləyən S.Ələkbərzadə bu müddətdə dünya şöhrəti qazanmış müğənnilərin sırasına qatılacağına əmindir.  Fəaliyyətinin nəticəsi olaraq, həmçinin, şirkət tərəfindən onun  üç diski buraxılacaq. “Şəbi Hicran” layihəsi əsasında “Açılmış çiçək” adlı SD-nin bu ilin sentyabr ayında işıq üzü görəcəyini söyləyən müğənni diskdə bəzi dəyişikliklərin də ediləcəyini açıqlayıb. Sevda Ələkbərzadə, həmçinin, onu da əlavə edib ki, şirkət onun  solo konsertlərini təşkil etməklə yanaşı,  yeni çəkiləcək kliplərinin də  dünya kanallarında yayımlanmasını öz  öhdəsinə götürüb. 

Avropada fəaliyyət göstərməsinə  baxmayaraq, Azərbaycanda keçiriləcək bütün tədbirlərə qatılacağını söyləyən Sevda mədəniyyət və turizm naziri Əbülfəs Qarayevlə görüşündən də danışıb. “Nazir burada keçiriləcək tədbirlərə qatılıb-qatılmayacağımla maraqlandı. Mən isə söylədim ki, dəvət olunduğum bütün konsert proqramlarında iştirak edəcəm”.

“Network Medien” şirkətinin direktoru Kristian Şolts S.Ələkbərzadə ilə tanışlığından danışıb. Sevdanın səsini disk vasitəsilə eşidən Kristian Şolts şirkətin işçilərinə bu xanımla əlaqə qurmağı, onun haqqında məlumat toplamağı tapşırıb. Gözəl səsə malik müğənninin şirkətində çalışacığından məmnunluq duyan Kristian Şolts Sevdanın səsləndirdiyi mahnılara əlavələr edilməsinin istisna olunmadığını deyib. K.Şolts S.Ələkbərzadənin imicində də dəyişikliklərin olacağını söyləyib. “Çünki Sevdanın ifasında olan bəstələrin beynəlxalq səhnələrdə gözəl səslənməsi, özünün qeyri-adi görünməsi üçün bunlar vacib şərtlərdəndir” - deyib. “Şəbi Hicran”a pop, caz musiqiləri daxil edəcəyini deyən qonaq yalnız muğam hissəsini olduğu kimi saxlayacaqlarını söyləyib. O, muğamı çox sevdiyindən, muğam janrının artıq  dünyada tanınıb bəyənildiyindən danışıb.

Gündəlik Azərbaycan.-2007.-4 aprel.-S.14.