Mehriban Əliyeva Litva Prezidenti Valdas Adamkusla görüşüb

Heydər Əliyev Fondunun prezidenti YUNESKO xoşməramlı səfirlərinin ənənəvi illik hesabat yığıncağına da qatılıb

AzərTAc. Fransada səfərdə olan Azərbaycanın birinci xanımı, YUNESKO-nun xoşməramlı səfiri, Milli Məclisin deputatı Mehriban Əliyeva Parisdə YUNESKO-nun əsas iqamətgahında qurumun xoşməramlı səfirlərinin ənənəvi illik hesabat yığıncağında iştirak edib. Yığıncağı təşkilatın baş direktoru Koişiro Matsuura açaraq xoşməramlı səfirləri 7-ci illik hesabat münasibətilə təbrik edib, onların

son bir il ərzində gördükləri işlər barədə müfəssəl məlumat verib. Baş direktor müxtəlif qitələri və ölkələri təmsil edən səfirlərin dünyanı narahat edən bir çox problemlərin həllində fəal iştiraklarını xatırladıb, təşkilata hərtərəfli yardım göstərdiklərini, YUNESKO-nun davamlı inkişafı xüsusi diqqətdə saxladığını vurğulayıb.

Təhsil sahəsindən söhbət açan baş direktor hələ də dünyada milyonlarla uşağın təhsildən kənarda qaldığını bildirib, YUNESKO tərəfindən keçirilmiş beynəlxalq konfranslardan danışıb. O, Azərbaycanın birinci xanımının fəaliyyəti sayəsində Azərbaycanla YUNESKO arasında yaranmış sıx əməkdaşlığı, təhsillə bağlı regional konfransın 2008-ci ildə Bakıda keçirilməsi barədə Mehriban Əliyevanın təşəbbüsünü yüksək qiymətləndirib.

Yığıncaqda Mehriban xanım Əliyeva çıxış edib. Mehriban xanım çıxışının əvvəlində baş direktoru və həmkarlarını ənənəvi illik hesabat yığıncağı münasibətilə salamlayıb. Azərbaycanın birinci xanımı YUNESKO tərəfindən tərəfdaşlıq məsələsi ilə əlaqədar Qətərdə keçirilmiş regional konfransı xatırladıb, xoşməramlı səfirləri “Hamı üçün təhsil” proqramı çərçivəsində 2008-ci ilin iyul ayında Azərbaycanda keçiriləcək yekun regional konfransa dəvət edib.

Ötən ilin “Qeyri-maddi mədəni irsin qorunması haqqında” Konvensiyanı ratifikasiya etmiş ölkələrin Baş Məclisinin 2006-cı il iyun ayının 26-da keçirilməsi ilə yadda qaldığını xatırladan Mehriban xanım Əliyeva Azərbaycanın cari ilin mart ayında bu Konvensiyanı ratifikasiya etdiyini bildirib. Mehriban Əliyeva qeyri-maddi irsin qorunması və təbliğinin ümdə vəzifə olduğunu vurğulayıb və bu sahədə ölkəmizdə görülən işlərdən söhbət açıb.

Heydər Əliyev Fondunun son bir ildəki fəaliyyətindən danışan xoşməramlı səfir həmin fəaliyyətin səmərəli olduğunu xüsusi vurğulayıb, təhsil, elm, mədəniyyət, səhiyyə və ətraf mühitin qorunması kimi sahələrdə Fondun öz işini davam etdirdiyini, bir sıra layihələrin artıq başa çatdırıldığını, “Yeniləşən Azərbaycana yeni məktəb” proqramının uğurla həyata keçirildiyini bildirib. Mehriban Əliyeva deyib ki, Heydər Əliyev Fondu, Vaşinqton Elmlər Akademiyası və YUNESKO Bakıda orta əsr əlyazmalarında tibb və əczaçılıq mövzusunda ilk beynəlxalq konfrans təşkil edib. Hazırda ölkəmizdə təbabətə dair 3 qiymətli əlyazma qorunub saxlanılır və onlar ümumdünya yaddaş qeydiyyatına salınyıb. Bu əlyazmalar bütün bəşəriyyət üçün böyük əhəmiyyət daşıyır.

     Memarlıq abidələrinin bərpasında Heydər Əliyev Fondunun fəal iştirakını qeyd edən Mehriban Əliyeva son vaxtlar Azərbaycanda bir çox tarixi və dini abidələrin bərpa edildiyini xatırladıb, eyni zamanda, Fondun ölkəmizin hüdudlarından kənardakı ümumbəşəri əhəmiyyət daşıyan mədəni abidələrin bərpasında da iştirakını vurğulayıb, Parisin yaxınlığında, Versalda bərpa işlərində Heydər Əliyev Fondunun əməli fəaliyyət göstərdiyini bildirib.

Azərbaycanın qeyri-maddi mədəni irslərindən biri olan muğamın qorunması və təbliği üçün bir çox işlər görüldüyünü deyən Mehriban Əliyeva bu sahədə Azərbaycana hərtərəfli kömək göstərmiş YUNESKO-ya minnətdarlığını bildirib. Cənab K.Matsuuranın iştirakı ilə Bakıda təməli qoyulmuş Beynəxalq Muğam Mərkəzinin tikintisinin davam etdirildiyini,  2008-ci ilin yayında mərkəzin açılışı ilə əlaqədar keçiriləcək təntənəli tədbirdə baş direktorun iştirak edəcəyinə ümidvar olduğunu bildirib.

Mehriban xanım Əliyeva çıxışının sonunda Heydər Əliyev Fondunun Pakistandakı qızlar məktəbi ilə əlaqədar həyata keçirdiyi layihə barədə də  məlumat verib. O, dünya şöhrətli musiqiçi Mstislav Rostropoviçi anadan olmasının 80 illiyi ilə əlaqədar bütün xoşməramlı səfirlər adından təbrik edib. Mehriban Əliyevanın çıxışı Heydər Əliyev Fondunun muğam və Pakistandakı qızlar məktəbi ilə əlaqədar hazırladığı layihələri əks etdirən slaydlarla müşayiət olunurdu.

Yığıncaqdan sonra Heydər Əliyev Fondunun prezidenti, Litvanın Prezidenti Valdas Adamkusla görüşüb. Söhbət zamanı Mehriban xanım Əliyeva son illər ərzində Azərbaycanda mədəniyyət sahəsində görülmüş işlərdən, Heydər Əliyev Fondunun bu yöndə fəaliyyətindən danışıb. Azərbaycana etdiyi səfərini xatırladan Valdas Adamkus onun salamlarını Prezident İlham Əliyevə çatdırmağı xahiş edib, bu səfərdən yüksək təəssürat aldığını xüsusi vurğulayıb. Ölkələrimiz arasında mədəni əlaqələrin inkişaf etdirilməsinin zəruriliyini bildirən dövlət başçısı Prezident İlham Əliyevi və Mehriban xanımı Litvaya səfərə dəvət edib.

Bundan başqa Mehriban Əliyeva İordaniya kraliçası, YUNESKO-nun xoşməramlı səfiri Raniyə əl-Abdullah ilə görüşüb. YUNESKO-nun iqamətgahında keçirilən görüşdə xanım Raniyə əl-Abdullah rəhbərlik etdiyi İordan Çayı Fondunun xeriyyə tədbirlərindən, valideyn qayğısından məhrum olmuş uşaqlara himayədarlıq edilməsi, onların hərtərəfli təhsil alması və digər sahələrdə gördüyü işlər barədə məlumat verib. Mehriban Əliyeva Heydər Əliyev Fondunun tarixindən, Azərbaycanda  maddi və qeyri-maddi mədəni irsin qorunması, kimsəsiz uşaqlara göstərilən qayğı, təhsil sahəsində YUNESKO ilə birlikdə həyata keçirilən  layihələr haqqında danışıb.

Mehriban xanım YUNESKO-nun baş direktoru Koişiro Matsuura və digər xoşməramlı səfirlərlə birlikdə xatirə şəkli çəkdirib, baş direktorun və xoşməramlı səfir Şeyx Həsən İ.Şikerin xoşməramlı səfirlərin şərəfinə verdikləri ziyafətdə iştirak edib.

Mehriban xanımın Fransa Milli Assambleyanın sədri Patrik Olye ilə görüşündə isə P.Olye Azərbaycan Prezidenti İlham Əliyevin bu ilin yanvarında Fransaya dövlət səfəri zamanı Milli Assambleyadakı görüşünü xatırladıb. Söhbət zamanı ölkələrimiz arasındakı münasibətlərə dair fikir mübadiləsi aparılıb.

Mehriban Əliyeva ölkələrimiz arasında mədəni sahədə əməkdaşlığın daha da inkişaf etdirilməsinin zəruriliyini xüsusi vurğulayıb və Azərbaycanda Fransa, Fransada isə Azərbaycan mədəniyyəti günlərinin keçirilməsini təklif edib.

Milli Assambleyanın sədri Azərbaycanın birinci xanımının bu fikrini böyük razılıq hissi ilə qarşılayıb və bu məsələnin seçkilərdən sonra nəzərdən keçiriləcəyini vurğulayıb. O deyib ki, nəinki mədəniyyət sahəsində, eyni zamanda, iqtisadi sahədə də əməkdaşlığın inkişaf etdirilməsi üçün addımlar atılacaq. Milli Assambleyanın İqtisadi əlaqələr komitəsi üzvlərinin Azərbaycana səfəri təşkil ediləcək. Palatanın sədri bildirib ki, bu səfər ölkələrimiz arasında əməkdaşlığın daha da dərinləşməsinə kömək edəcək. Görüşdə Ermənistan-Azərbaycan, Dağlıq Qarabağ münaqişəsinə də toxunulub. Milli Assambleyanın sədri ölkəsinin Azərbaycanın ərazi bütövlüyünü dəstəklədiyini bir daha vurğulayıb, Minsk qrupunun həmsədrlərindən biri kimi Fransanın bundan sonra da münaqişənin sülh yolu ilə həllinə səy göstərəcəyini söyləyib.

Yeni Azərbaycan.-2007.-5 aprel.-S.3.