Qaliboğlu E.
Kvazimodo
Tamaşada
insan faciələrinin çeşidləri sıralanır
Elçin
Qaliboğlu
Bugünlərdə
Akademik Milli Dram Teatrında Viktor Hüqonun "Paris Hotrdam
kilsəsi" romanı əsasında hazırlanmış
"Kvazimodo" adlı bir pərdəli faciənin premyerası
oldu. Tamaşanın tərcüməsi və səhnə
variantı həm də tamaşanın quruluşçu
rejissoru olan Samir Qulamova məxsusdur.
Rolları
əməkdar artist Ayşad Məmmədov (Keşiş), Aslan
Şirin (Kvazimodo), Vəfa Rzayeva (Esmeralda), Cəlal
Məmmədov (Qrequar), Sərdar Rüstəmov (Baş
təlxək), Lüdovik (Ramil Zeynalov), əməkdar artist
Firuz Xudaverdiyev (Qoca təlxək), Elnar Qarayev (dövlət
naziri), Mahir Mirişli (Hakim), Ramil Zeynalov (zindan rəisi), Rada
Nəsibova (Qara təlxək) və başqaları ifa
edirlər.
Tamaşada
1480-ci il Fransasının qarışıq dövrü
təsvir edilir. Ümumiyyətlə, tamaşadakı
hadisələr dolayısı ilə bəşər
həyatının bütün məqamlarını ifadə
edir. Fransanın həyatında, insanlarının
yaşamında yeni bir dövrün başlandığı
təsvir edilir. Amma həmişə yenilik gələndə
ona heç də qucaq açılmır; Fransada yeni
sözə, ictimai tərəqqiyə, insanın azad
düşüncəsinə daha kəskin sədd qoyulur.
Fransaya almanların ixtira etdikləri çap
maşınının gətirilməsinə qəti
qadağa qoyulub. Bu işdə kilsə dövlətdən daha
səylidir. Kilsə dövləti inandırmağa
çalışır ki, əgər Fransada çap
maşını olarsa, az vaxtdan sonra bu, artar; beləliklə,
nəticədə yeni fikirlər, insan azadlığına
çağıran vərəqlər təsəvvürəgəlməz
dərəcədə daha sürətlə nəşr edilib
yayılacaq; camaat artıq kilsənin kitablarına meyl
etməyəcək.
Tamaşanın
başlanğıcında küçə səfillərinin,
qaraçıların şənlənməsi təsvir edilir.
Sonra ildırım çaxır, göy guruldayır. Budur,
kilsənin qabağında səbətdə bir körpə
ürək parçalayan bir səslə ağlayır. Qara
niqablı bir kişi gəlir, azca fikirləşəndən
sonra uşağı götürür. Bu, sonralar
əsərin qəhrəmanına çevriləcək
Kvazimododur. Keşiş onu öz oğlu kimi
böyüdüb, boya-başa çatdırıb. Kvazimodo
ağlı kəsəndən həyatın müxtəlif
sahələrinə dair ədəbiyyat oxuyub. İndi
yaşının bu vaxtında onun dünya, insanlıq
haqqında müəyyən təəssüratları var.
Kvazimodo insanlığa daim təşnədir:
anadangəlmə insanı sevməsinə baxmayaraq daim fiziki
eybəcərliyindən əzab çəkir. Ağlına
çatır ki, təbiətin insanı zahirən çirkin
yaratması fəlakət deyil, əsas odur ki, insanın daxili
aləminə yetməyə, insaniiyini aşkarlamağa
hünəri olsun. Amma Kvazimodonun ətrafındakılar onu
daim lağa qoyur, hər addımda eybəcərliyini
üzünə deyirlər. İnsanın bunca ələ
salınması, əzaba düçar edilməsi
dəhşətdir. Kvazimodonun bu məqamda çəkdiyi
əzabları aktyor Aslan Şirin məharətlə
yaradır. İri donqabelli, həyatın çəkdirdiyi
əzabdan daim az qala yerlə sürünən Kvazimodo
bütün başına gələnlərə baxmayaraq
qətiyyən insanlara olan inamını itirmir. O,
keşişin oğurlatdırmaq istədiyi Esmeraldanı
qorumaq üçün döyüşəndə belə
halına, şikəstliyinə uyuşmayan cəldliklə
hərəkət edir. Bu, Kvazimodonun ruhunun fitrətən
güclü olduğunun göstəricisidir. Sonralar Kvazimodonun
insana qarşı daha da inamlı olmasına səbəb onun
nahaqdan günahlandırılaraq şallaqlanması
səhnəsində Esmeraldanın bir udum su verməsidir. Bu,
Kvazimodoya bəsdir: o, insanın başqası
tərəfindən dəyərləndirildiyini gördükcə
yaşamağa sevgisi artır.
Tamaşadakı əsas
rollardan biri də Esmeraldadır. Vəfa Rzayeva
qaraçı qızının
surətini yarada bilib. Daim sevmək, sevilmək
istəyən, insana qarşı olan haqsızlığa hiddətlənən
Esmeralda qətiyyən keşişin
yalvarışlarına məhəl
qoymur, onun cismani nəşə aləti olmur. Tale Esmeraldadan üz
döndərəndə belə
Kvazimodo talenin səhvini düzəldir, onu sonacan qoruyur.
Esmeralda bir təsadüfən
taleyini Qrequarla bağlayıb.
O, dar ağacında olarkən artıq hər şeydən əlini üzüb. Bu dəm
meydana atılan Kvazimodo aranı qarışdırır, Esmeraldanı
dar ağacından qurtararaq kilsədə gizlədir. Kvazimodonun ac Esmeraldaya yemək
gətirməsi səhnəsi
də yaxşı alınıb.
Esmeralda bu məqamda bir daha Kvazimodonun
ürəyinin böyüklüyünü
anlayır.
Esmeraldanın başına
gələn bütün
fəlakətlərin səbəbkarı
olan keşiş isə yenə də onu ələ
keçirəcəyinə ümid bəsləyir.
Esmeralda kilsəyə dua etməyə gələrkən
ona sevgisini bildirən keşiş rədd cavabı alır. Qaraçı qızı keşişin
gözlərindəki insansızlıqdan
dəhşətə gəlir.
Onun baş yaylığı bu zaman kilsədə
qalır. Az sonra kilsəyə gələn
dövlət nazirinin qadağan olunmuş kitablardan birini oxuduğunu görən keşiş onu bu yoldan döndərməyə
çalışır, mümkün
olmadıqda isə Esmeraldanın yaylığı
ilə boğur.
İndi Esmeralda dar
ağacından qurtulub
yenidən sığındığı
kilsədə ölümünü
gözləyir. Keşiş indi
daha da güclüdür.
Ölkədə azadlığa çağırış
şüarlarının artması
gənc kralı qorxuya salıb. O, əvvəllər camaatın
azadlıq istəklərinə
dəstək olacağını
desə də, indi gördükərindən
dəhşətə gəlir.
Keşişə yalvararaq kömək
istəyir, ona müstəsna səlahiyyətlər
verir. Keşiş
gənc krala az vaxta
gizli vərəqələri
çap edənləri
tapacağına söz
verir. Bir təsadüf nəticəsində
o, bu işi Qvazimodonun etdiyini öyrənir. Lakin Qvazimodo
etdiyi işdən qətiyyən qorxmur, hətta keşişə nifrətini də ifadə edir. Keşiş düşdüyü vəziyyətin
baiskarı kimi daim Esmeraldanı görür, onu öldürmək qərarına
gəlir. Amma Kvazimodo
ona istəyini reallaşdırmağa imkan
vermir, keşişin zərbəsindən ölümcül
yaralansa da, onun zərbəsilə özünü də öldürür. Keşiş son nəfəsində dövlət
nazirini öldürdüyünü
etiraf edir. Kvazimodonun ölümündən sonra
Esmeralda kilsə zənglərini
vurur.
Tamaşadan çıxan
qənaət isə budur: nə qədər ki, insan öz xeyir
imkanlarını aşkarlayıb
özünü yaratmayıb,
o, dəbdəbəli görünən
hansı quruluşu yaradır-yaratsın, yenə
də bunların heç birində xoşbəxt olmayacaq.
Xalq cəbhəsi.-2007.-14
aprel.-S.15.