Salmanov R.

“Milyonçunun dilənçi oğlu” yenidən səhnəyə gəldi

S.Ələsgərov və Ş.Qurbanovun “Milyonçunun dilənçi oğlu” musiqili komediyasının ilk tamaşasından 41 il ötür. 1966-cı il mart ayının 30-da oynanılan bu tamaşada respublikanın xalq artistləri Bəşir Səfəroğlu, Lütfəli Abdullayev, Mobil Əhmədov və digər populyar aktyorlar bir sıra yaddaqalan obrazlar yaratmaqla xalqın dərin rəğbətini qazanmış və bu tamaşa Üzeyir Hacıbəyov adına Respublika Dövlət mükafatına layiq görülən ilk əsər olmuşdu.
Məhz gözəl aktyor oyunu nəticəsində əsər öz adı ilə deyil — daha çox ölməz sənətkarımız Bəşir Səfəroğlunun “Ölünün də qıdığı gələr?” ifadəsilə xalqın yaddaşında əbədi iz qoymuşdu. Təəssüf ki, bu üç aktyorun ölümündən sonra bu əsər 1970-ci ildə yalnız bir dəfə xalq artisti Hacıbaba Bağırovun iştirakı ilə oynanıldı. Sonra daha səhnə üzü görmədi, teatrın repertuarından çıxarıldı. O vaxtdan düz 37 il ötdü. Zaman dəyişdikcə, ölkəmizin iqtisadiyyatında olduğu kimi, onun mədəni həyatında, xüsusən teatr sahəsində də əsaslı dönüş yarandı. Yeni layihələr həyata keçirilməyə başlandı. İstedadlı aktyor və rejissorların öz bacarıq və istedadlarını nümayiş etdirməsinə geniş imkan yaradıldı. Dünyanın hər yerində olduğu kimi, bizim teatrlarımızda da modern stilinə bir meyl yarandı. Bu tamaşaya ikinci səhnə həyatı vermiş gənc rejissor Mikayıl Mikayılov da əsərə günün prizmasından yanaşmış, daha baxımlı olması üçün əsəri yeni ruhda, yeni tərzdə işləyib hazırlamışdır. Əvvəlki quruluşdan fərqli olaraq, rejissor bu tamaşada mistik əhval-ruhiyyə verməyə çalışmışdır. “Milyonçunun dilənçi oğlu” komediyası gənc rejissorun bu teatrda səhnəyə qoyduğu ilk böyük əsərdir.
Bu günlərdə Azərbaycan Dövlət Musiqili Komediya Teatrında tamaşanın primyerası oldu. Şıxəli Qurbanovun bu əsərinin XXI əsr üçün də çox aktuallığını vurğulayan Mikayıl Mikayılov hər iki dövr üçün absurd teatr poetikasının əlamətdar olduğunu dedi. Əvvəlki psixoloji realist teatr üslubundan fərqli olaraq, rejissor bu tamaşada abstrakt, absurd teatr üslubuna daha çox yer ayırmışdır. Əgər əsərin əvvəlki variantında hadisələr yalnız bizə aid idisə, bu tamaşa, demək olar ki, dünyaya bir baxışdır. Əsərdə keçmiş SSRİ-nin, kommunizmin, faşizmin təzyiqi, müəmmalı ölüm, pulla satılan və alınan insan azadlığı, hətta ölümü belə çox geniş şəkildə öz əksini tapıb.
Görkəmli bəstəkarımız Süleyman Ələsgərovun gözəl musiqisi, əməkdar rəssam İsmayıl Əsədoğlunun verdiyi bədii tərtibat, xor və balet truppası tamaşanı daha canlı və yaddaqalan edir. Hər halda, ölməz əsərlərə yenidən səhnə həyatı verilməsi teatr mədəniyyətimizə yenidən qayıdışın bir təcəssümüdür. Sevindirici haldır ki, aktyorların çoxu istedadlı gənclərdir. Bu da ilk növbədə teatr rəhbərliyinin, baş rejissorun gənclərə göstərdiyi etimad və qayğının təzahürüdür.
Əsərin baş qəhrəmanı Yetim rolunun ifaçısı Ramil Qasımovdur. Mükəmməl vokal ifaçılığı ilə yanaşı, gözəl aktyorluq qabiliyyəti nümayiş etdirən gənc aktyorun cəmi 23 yaşı var. Mobil Əhmədovdan dərs almış Ramilin bilavasitə onun təşəbbüsü ilə Musiqili Komediya Teatrına ilk dəfə qədəm qoyanda cəmi 15 yaşı vardı. Fitri istedadı, gözəl və məlahətli səsi, musiqi duyumu, ifaçılıq məziyyətləri və ən nəhayət, səhnə mədəniyyətinə o vaxt yüksək qiymət vermiş korifey bəstəkarlarımız T.Quliyev və S.Ələsgərovun zəmanəti ilə müstəsna hal kimi işə qəbul edilir. Bu müddət ərzində bir sıra yaddaqalan obrazlar yaradaraq musiqi ictimaiyyəti və teatr kollektivi tərəfindən sevilir. Gəncin bu tamaşada canlı olaraq orkestr ilə vokal ifası və aktyor oyunu tamaşaçılar tərəfindən sürəkli alqışlarla qarşılandı. Hər bir aktyor öz üzərinə düşən rolun öhdəsindən məharətlə gəldi. Mərhum aktyorumuz xalq artisti Bəşir Səfəroğludan sonra kimsənin cürət edib oynamadığı polis rəisi rolunu bu dəfə rejissor teatrın aparıcı aktyorlarından biri əməkdar artist Ramiz Məmmədova həvalə edib. Alman zabiti geyimində səhnədə görünən Ramiz Məmmədov öz yerişi, alman dilində danışığı və ən nəhayət, Bəşir Səfəroğlunun işlətdiyi mizan və hərəkətlərlə tamaşaçı auditoriyasını o dəqiqə ələ ala bildi. Eyni sözləri gözəl aktrisamız, Senatorun xanımı rolunu oynayan əməkdar artist Xanım Qafarova haqqında da demək olar. Tamaşada Nadir Xasiyev — Senator, Nahidə Orucova — Kübar qadın, Elməddin Həmzəoğlu — Şair, Ələkbər Əliyev — Eynəkli, Eleonora Səfərova — Qonşu qız, Nərgiz Kərimova — Bildirçin, Gülnarə Əzizova — Müxbir rollarında çıxış edirdər. Teatrın baş dirijoru isə Nazim Hacıəlibəyovdur.
Sənətsevərlərin fikrincə, baş rolun ifaçısı Ramil Qasımov tamaşada çox güclü vokalist və aktyor kimi özünü təsdiq etdi.

Xalq qəzeti.-2007.-12 aprel.-S.7.