Ülvi A.

Teatrın Beynəlxalq uşaq bayramına töhfəsi

Azərbaycan Dövlət Gənc Tamaşaçılar Teatrının mətbuat xidmətindən bildirmişlər ki, teatrın bir qrup nümayəndəsi ötən gün Türkiyəyə yola düşdü. Məlumdur ki, hər il Türkiyənin Alanya şəhərində Beynəlxalq uşaq bayramı həftəsi keçirilir. Dünyanın müxtəlif yerlərindən dəvət olunmuş kollektivlərin və uşaqların sevincinə səbəb olan bu irimiqyaslı tədbirə təşkilatçıların təşəbbüsü ilə fəxri qonaqlar da qatılırlar. Bu ilki tədbirə Alanya şəhərinin rəhbəri cənab Həsən Sipahioğlu başçılıq edir. Bayramda ölkəmizi Azərbaycan Dövlət Gənc Tamaşaçılar Teatrı İ.Coşqunun “Çal oyna” (quruluşçu rejissor L.Kərimov) və N.Gəncəvinin “Xeyir və Şər” (quruluşçu rejissor N.Kazımov) tamaşaları ilə təmsil edirlər. Aprelin 23-dən 27-nə kimi keçiriləcək bu festivalda Azərbaycan nümayəndə heyəti iki gün öncədən iştirak edəcək, müxətlif mədəni tədbirlərin iştirakçısı olacaq. Səfərə çıxan qrupa teatrın direktoru, respublikanın əməkdar artisti Mübariz Həmidov rəhbərlik edir. Kollektiv türkiyəli uşaqlara təkcə sənət töhfəsi aparmır, həm də tamaşaların nəfis şəkildə çap olunmuş proqramlarını, teatrın bukletlərini, əsarətdə olan şəhərlərimizin fotoalbomlarını, milli suvenirlərimizi də hədiyyə edəcəkdir.,

Xalq qəzeti.- 2007.- 22 aprel.- S. 7.