Məhərrəmova T.

Bu gün balet mənim həyatımdır

Kamilla Hüseynova, balerina: "İşini sevmək və orada uğur qazanmaq xoşbəxtlikdir"

Opera və Balet Teatrının solisti, "Qızıl Dərviş" mükafatı laureatı, gənc balerina Kamilla Hüseynova Azərbaycan milli balet ənənələrini öz yaradıcılığında ləyaqətlə davam etdirən balerinalardandır. Gənc olmasına baxmayaraq, istedadı, əməksevərliyi, peşəkarlığı ilə balerina teatrın repertuarında olan bütün balet quruluşlarında - "Leyli və Məcnun", "Yizel", "Qız qalası", "Romeo və Cülyetta", "Karmen suita", "Rast", "Məhəbbət və ölüm" və başqalarında əsas partiyaları ifa edir. Onun rəqsləri dəqiqliyi, təmizliyi, hərəkətlərinə gözəllik verən əllərinin cazibədarlığı ilə yadda qalır. O, sanki rəqsin içərisinə daxil olur, incə və zərif bədəni ilə onu idarə edir. Bu zaman sanki canlı rəsm əsərlərinə bənzəyir.

Kamilla Hüseynova balet sənətinə olan məhəbbətindən, bu sənətin sirlərindən həvəslə danışır:

- Nə vaxtsa balet mənim uşaqlıq arzum olub. Lap uşaqlıqda, özümü başa düşdüyüm vaxtlardan balerinaları təqlid etməyə çalışır, müxtəlif balet hərəkətlərini təkrar edirdim. Bu gün balet mənim həyatımdır. Tamaşaçılar qarşısında təzim edərkən, onların alqışlarını eşidərkən, qeyri-adi hissiyyat keçirirəm, həyatda da bu hisslərə görə yaşayıram.

- Bu uşaqlıq arzunuz necə yaranmışdı?

- Mən elə ailədə böyümüşəm ki, nənəm də, anam da peşəkarcasına olmasa da, baletlə məşğul olurdular. Valideynlərim mənim həvəsimə mane olmadılar. Mən Bakı Xoreoqrafiya Məktəbinə daxil oldum. Balet sənətinin sirlərini mənə pedaqoqlardan Olqa Arifulina, SSRİ Xalq artisti Leyla Vəkilova, Xalq artisti Tamella Şirəliyeva öyrətdi. Bu gün də Tamella xanımla bir yerdə işləyirəm.

- Yəqin ki, balerinaların zirvəyə doğru yolu çox çətin və əzablıdır.

- Bunu yalnız belə adlandırmaq olar: öz əməksevərliyini nümayiş etdirirsən. Bunu səndən balet sənəti tələb edir. Axı baletin gözəlliyi tamaşaçıların səhnədə gördüyü bu gündəlik işin və məşqlərin nəticəsidir. Ancaq aparıcı balerina olmaq, qalanlarını öz arxasınca aparmaq qabiliyyəti üçün böyük təcrübə, solo partiyaları ifa eləmək bacarığı vacibdir. Məşqin tələb elədiyi qaydada və bəlkə ondan da çox işləmək lazımdır. Balerina üçün ən vacib olan xüsusiyyət öz çatışmazlıqlarını və səhvlərini görməkdir. Bəzən tamaşalardan özünəinamsızlıq hiss edəndə, bu məni daha çox işləməyə təkid edir, hətta buna görə məzuniyyətimdən də imtina edirəm.

- İlk əsas partiyanız haqqında nə danışa bilərsiniz?

- İlk və ən sevimli partiyam "Romeo və Culyetta" tamaşasında Culyetta rolu idi. Məktəbi təzə qurtaran bir balerina üçün bu rol üzərində işləmək çətin idi. Bu məndən böyük məsuliyyət tələb edirdi. Çünki Culyetta kifayət qədər məşhur qəhrəmandır. Ancaq deyilənə görə, mən rolun öhtəsindən gəldim.

- Bəs hansı rola görə "Qızıl Dərviş" mükafatını almısınız?

- Bu, maestro Niyazinin eyniadlı simfonik muğamı əsasında Tamilla Şirəliyevanın quruluş verdiyi "Rast" muğam-baleti idi. Baletin süyet xətti də vətənpərvər mövzudadır. Vətənə məhəbbət, onun müdafiəsi... Mən əsas qəhrəman Tomris partiyasını ifa edirdim. Tamaşa çox maraqlı və koloritli alındı. İlk dəfə muğam qismində burda musiqi improvizasiyası ifadə olunmuşdu.

- Siz həmçinin tamaşaçılara lirik qəhrəmanlar, əsas obrazlar kimi tanışsınız.

- Həqiqətən belədir. Mənim repertuarımda çoxlu lirik partiyalar var. Leyli, Yizel, Gülyanaq, Culyetta və həmçinin "Karmen suita" baletində Karmen partiyasını, "Rast"da epik qəhrəman Tomrisi, Polad Bülbüloğlunun "Eşq və Ölüm" baletində Beycan partiyasını oynayıram. Sonuncu tamaşanın qəhrəmanı lirikliyi, emosionallığı və cəsurluğu ilə fərqlənir. Lirik qəhrəmanlar mənə çox yaxındır. Bu baxımdan "Karmen" obrazı mənimçün çox maraqlıdır. Bu, mənim ruhuma Tomris obrazı qədər yaxındır. Mən bu obrazı daxilimdə hiss edirəm. Lirikliyə gəldikdə, mənə elə gəlir ki, xeyirxah, lirik obraz hər bir qadında təbiətən yaranır.

- İndicə dediniz ki, "Polad Bülbüloğlunun "Eşq və ölüm" baletindəki Beycan da sizə yaxındır. Bu partiyanın sizə tapşırılması gözlənilməz idi?

- Əlbəttə, ilk növbədə mənə etimad göstərmələri çox yaxşı idi. Bu mənim boynuma çox böyük məsuliyyət qoyurdu. Axı teatrda bu partiyanı oynaya biləcək çoxlu solistlər var. Rol üzərində iş çox mürəkkəb və maraqlı, eyni zamanda, qeyri-adi və oriyinal idi. Quruluşda iki kollektiv - rəqs ansamblı ilə balet truppası iştirak edirdi. Eyni zamanda, səhnələrdə artistləri adət eləmədikləri texniki təchizat - videoekran, tüstü və s. müşayiət edirdi. Balet muiqi materialları ilə zəngin idi. Dramatik süyeti emosional qüvvə tələb edirdi.

- Klassik balet müasirlərdən nə ilə fərqlənir?

- Klassik baletdə təyin olunmuş qanunlar, pozisiya, əl və ayaqların hərəkəti, baletmeysterin çərçivədən çıxa bilməyəcəyi hərəkətlər var. Müasir, modern balet isə həm baletmeystrə, həm də ifaçıya tamamilə sərbəstlik imkanı verir. Bizim repertuarda "Balero" müasir tamaşası və "Həzz" tamaşaları var. Bu tamaşalar Azərbaycan baletində yeni sözdür. Bundan əlavə, bir addım irəli deməkdir. Çünki müasir balet artistə imkanlarını açmağa şərait yaradır.

- Demək olarmı, ən sevimli tərəf-müqabiliniz sizinlə bir yerdə çalışan həyat yoldaşınızdır?

- Mən bir çox baleronlarla - Əməkdar artist Gülağası Mirzəyev, Makar Perştand, həyat yoldaşım İslam İslamovla oynamışam. Şübhəsiz ki, ən rahat tərəf-müqabil həyat yoldaşımdır. Biz bir-birimizə daha çox söz deyə bilərik. Ümumiyyətlə, bəxtim gətirib ki, təcrübəmdə narahat tərəf-müqabillərim olmayıb. Mən həmişə səhnədə özümə inam hiss edirəm. Əgər hətta bilsəm ki, mənə nəsə olacaq, həmişə tərəf-müqabilimin köməyini tapmağı bacarıram. Bu, böyük uğurdur. Oynadığın baletin müvəffəqiyyətinin yarısı tərəf-müqabilindən asılı olur.

- Sizcə artist həmişə tamaşada rolları ələ keçirməyə çalışmalıdır?

- Artist həmişə zirvəyə doğru can atmalıdır. General olmağı arzulamayan əsgər pis əsgərdir. Əgər daxilən rola hazırsansa və buna inanırsansa, bunu bacaracaqsan.

- Belə bir fikir gəzir ki, balet adamları xəyalpərəstdirlər, sanki nağıllar aləmində yaşayırlar. Lap əksər balet süyetlərinin nağılvari qəhrəmanları kimi.

- Bu, həqiqətən belədir. Cəsarətlə deyə bilərəm ki, rəqqaslar qeyri-adi ruha malik adamlardır. Mənə elə gəlir ki, bu hiss bütün incəsənət adamlarına xasdır. Ancaq balet artistləri öz fantaziyaları və arzuları ilə fərqlənirlər.

- Xaraktercə necə adamsınız - optimist, realist, əməksevər? Özünüzdə nəyi dəyişmək istəyirsiniz?

- Mənim müxtəlif xüsusiyyətlərim var. Mən optimizmdən məhrum deyiləm. Yəqin ki, bu hiss mənə işləməyə və gələcəyə olan ümidlərimə təkan verir. Həyata real baxmağa çalışıram. İstərdim ki, bir az da tənbəllikdən uzaq olum. Valideynlərim və həyat yoldaşım tez-tez mənə deyirlər ki, sən özünə həddindən artıq tənqidi yanaşırsan. Amma mən hələlik xarakterimin bu keyfiyyətindən xilas ola bilməmişəm.

- Baletimizin bugünkü vəziyyətini necə qiymətləndirirsiniz?

- Vaxt var idi ki, balet sənətinin geriləməyindən danışırdılar. Amma bu gün teatr repertuarına, qurulan tamaşaların keyfiyyətinə baxanda tamaşaçıların marağı, anşlaq balet sənətinin inkişaf etdiyini deməyə imkan verir. Özünüz fikirləşin, teatr hər mövsümə 1 və ya 2-3 premyera ilə başlayır. Teatrda modern və milli balet quruluşları ilə yanaşı, daima klassik tamaşaları da nümayiş etdiririk. Bu, balet artistlərinin peşəkarlığını, bütün dünyada ən yaxşı məktəb ifaçılığını göstərir. Bu xidmət ən çox teatrın direktoru Arif Məlikovun, teatr truppasının rəhbəri, Əməkdar incəsənət xadimi Yulana Əlikişizadə, əsas repetitor Tamilla Şirəliyeva və Pulumba Aqalınındır.

- Sizin həyatda başqa maraqlarınız da varmı?

- Təbiəti çox sevirəm. Gülləri, heyvanları. Məhz buna görə də Qərb Universitetinin ekoloyi menecment fakültəsinə daxil olub, magistr təhsilini bitirmişəm. Boş vaxtımı, az olmasına baxmayaraq, evimdə saxladığım heyvanlara həsr edirəm. Üç gözəl pişiyim var. Əlbəttə, it də saxlamaq istəyirəm. Ancaq bu, əlavə vaxt tələb edir.

- Balerinalar həmişə xüsusi pəhrizlərlə yaşayır. Bütün imkanlardan forma xatirinə imtina edirlər.

- Ancaq bəxtim gətirib ki, heç bir pəhrizdən istifadə etmirəm. Əlbəttə, tamaşa zamanı güclü ərzaqlar yeyirəm ki, bu mənə problem yaratmasın.

- Qadınlara nə arzu edirsiniz?

- Hər bir qadına bağlandığı işinə özünü həsr etməyi arzulayıram. Hər bir qadın bir işdən ötrü doğulub. İşini sevmək və orada uğur qazanmaq xoşbəxtlikdir.

Kaspi.-2007.-3 aprel.-S.16.