Məmmədova G.

Azərbaycan Turizm İnstitunda kitabxana açıldı

Dünən Azərbaycan Turizm İnstitutunda kitabxananın açılışı ilə bağlı tədbir keçirildi. Qeyd edək ki, yeni açılmış kitabxanaya Heydər Əliyev Fondu tərəfindən turizm sahəsinə aid olan rus və ingilis dilində 28 adda 50, Azərbaycan Respublikasının Prezidenti İiham Əliyevin tapşırığı ilə yenidən nəşr edilən Milli Elmlər Akademiyasının Azərbaycan və rus dillərində dərc olunan 150 kitabı hədiyyə edilib. Bundan başqa, Azərbaycan Turizm İnstitutuna Azərbaycan Respublikası Mədəniyyət və Turizm Nazirliyinin vəsaiti hesabına 800-ə yaxın 431 adda rus dilində "Turizm marketinqi", "Turizm menecmenti" və turizm sahəsinə aid olan müasir kitablar, lüğətlər, ensiklopediyalar verilib. Açılışda Mədəniyyət və Turizm nazirinin müavini Sevda Məmmədəliyeva iştirak edirdi. Tədbiri açıq elan edən Azərbaycan Turizm İnstitutunun rektoru Cəfər Cəfərov kitabxanaların yaradılmasının təqdirəlayiq olduğunu qeyd edərək, onlara göstərdiyi xüsusi qayğıya görə Mədəniyyət və Turizm nazirinə öz minnətdarlığını bildirdi. Həmçinin qeyd etdi ki, gələcəkdə kitabxananın həcmi genişlənəcək, kitabların sayı çoxaldılacaq. Bundan əlavə, o, əksər kitabların Azərbaycan dilində olmamasına xüsusi diqqət yetirərək tezliklə öz dilimizdə kitabların sayının çoxaldılacağını və xarici dillərdə olan kitabların tərcümə ediləcəyini vurğuladı. Rektor onu da qeyd etdi ki, ATİ-də gələcəkdə yeni ixtisaslar yaradılacaq. Bunlara mədəni turizm, idman turizmi, muzeyşünaslıq və başqaları aiddir. Sevda Məmmədəliyeva çıxış edərək bu kitabxananın yaradılmasında prezidentin və nazirliyin mühüm xidmətlərindən bəhs etdi və bildirdi ki, kitabların Azərbaycana gətirilməsində Mədəniyyət və Turizm naziri Əbülfəs Qarayevin təşəbbüsü ilə Bakıya gəlmiş Yevgeni Kuzminin çox böyük xidmətləri var.

ATİ-nin turizm ixtisası fənləri kafedrasının müdir əvəzi Bahadur Bilalov sonda elan etdi ki, 19 aprel 2007-ci ildə ATİ-nin konfrans zalında ölkənin ali məktəblərində "Turizm və sosial mədəni servis xidməti" ixtisası üzrə bakalavr pilləsində təhsil alan tələbələr üçün "Azərbaycan turizmi: bu gün və sabah" mövzusunda elmi-praktik konfrans keçiriləcək. Konfransın məqsədi tələbələrin diqqətini turizmə yönəltməkdir.

Yaddaş.- 2007.- 12 aprel.- S. 3.