Milli
Parkın yeni layihəsi mayın əvvəlində təqdim
olunacaq
"Monumental
heykəltəraşlıq abidələri, xatirə memorial və memarlıq kompleksləri haqqında" prezident sərəncamı ilə
bağlı müşavirə
keçirilib
Mədəniyyət və turizm naziri Əbülfəs Qarayev M.F.Axundov adına Milli Kitabxanada ölkə başçısının bu
il aprelin 2-də "Azərbaycan Respublikasındakı
monumental heykəltəraşlıq
abidələri, xatirə
memorial və memarlıq kompleksləri haqqında" imzaladığı
sərəncamla bağlı
müşavirə keçirib.
Tədbirdə çıxış
edən Ə. Qarayev son bir neçə
ay ərzində mədəniyyət sahəsində
bir sıra mühüm sərəncamların
imzalandığını xatırladıb:
"Bu sərəncamların
qəbul olunmasının
təşəbbüskarı ölkə başçısının
özü olub. Ötən il dekabrın 18-dən başlayaraq Bakıda İstiqlal Muzeyinin yaradılması və İstiqlal abidəsinin ucaldılması, Müasir
İncəsənət Muzeyinin
yaradılması, teatr
və kino sənətinin inkişaf etdirilməsi, muzey işinin yaxşılaşdırılması,
Azərbaycan Rəssamlar,
Bəstəkarlar və
Yazıçılar ittifaqlarının
fəaliyyətinin yaxşılaşdırılmasına
dair xüsusi fərmanlar imzalanıb. Bu sərəncamların respublikanın inkişafı
üçün nə
qədər əhəmiyyətli
olduğu hər birimizə məlumdur. Sonuncu sərəncam isə Azərbaycanın hər bir küçəsini
əhatə edən bir sərəncamdır. Artıq şəhər və rayon rəhbərləri
tikiləcək memorial
kompleks, aparılacaq abadlıq işləri barədə bizə məlumat verməli və mütləq layihənin eskizi bizə təqdim olunmalıdır. Həmin
işlər yalnız
ekspertlər tərəfindən
təsdiq olunduqdan sonra həyata keçirilə bilər".
Nazir bildirib
ki, şəhər və rayonlarda Böyük Vətən müharibəsi dövrünü
əks etdirən lövhələr, abidələr,
komplekslər bərbad
vəziyyətdədir: "Digər tərəfdən,
Azərbaycan müstəqillik
dövrünün və
müharibədə həlak
olmuş şəhidlərin
xatirəsinin də ədəbiləşdirilməsi gündəmdə olan ən vacib məsələlərdən
biridir. Bölgələrdə
yerləşən Şəhidlər
Xiyabanlarının vəziyyəti
istədiyimiz səviyyədə
deyil". Ə. Qarayev
sərəncamdan irəli
gələn vəzifələrin
həyata keçirilməsi
ilə bağlı xüsusi şuranın yaradılacağını da
deyib. Onun sözlərinə görə,
Ekspert Şurasında
bu sahənin biliciləri təmsil olunacaq."Aprelin sonu-mayın əvvəlində Milli Parkın yeni layihəsi də təqdim olunacaq. Artıq layihə üzərində tamamlanma
işləri aparılır.
Çox güman ki, layihə müzakirə olunduqdan və qəbul olunduqdan dərhal sonra Milli Parkda
yenidənqurma işlərinə
başlanılacaq"-deyə
Əbülfəs Qarayev
bildirib. Nazirin sözlərinə görə,
layihə hazır olduqdan sonra artıq xarici ölkələrdən də
mütəxəssislər işə
cəlb olunacaq.
Müşavirədə Prezident Aparatının
regionlarla iş üzrə şöbənin
müdiri Tahir Budaqov, Azərbaycan Rəssamlar İttifaqının
sədri Fərhad Xəlilov, Azərbaycan Memarlar İttifaqının
sədri Hafiz Əmirxanov, AMEA Memarlıq
və İncəsənət
İnstitutunun direktoru
Rasim Əfəndiyev çıxış edərək,
üzərlərinə düşən vəzifələri
həyata keçirəcəklərinə
söz veriblər. Tədbirdə respublikanın
rayon və şəhər icra başçılarının müavinləri,
mədəniyyət sosial
şəhərsalma problemləri
ilə bilavasitə məşğul olan insanlar və baş memarlar iştirak ediblər.
Səs.-2007.-11 aprel.- S. 12.