Baxışova G.

Musiqi Mədəniyyəti Muzeyinin 40 yaşı tamam oldu

Aprelin 3-də Azərbaycan Musiqi Mədəniyyəti Dövlət Muzeyində muzeyin 40 illik yubileyi münasibətilə tədbir keçirildi. Tədbirdə muzeyin zəngin kolleksiyasının bir hissəsi nümayiş etdirildi.

Muzey bu 40 il ərzində 40 mindən artıq eksponat toplamış, elmi axtarışları sayəsində Niyazi, Cövdət Hacıyev, Soltan Hacıbəyov, Qara Qarayev, Polad Bülbüloğlu və Fərhad Bədəlbəyliyə məxsus naməlum musiqiləri aşkar etmişdir. Tədbirdə tanınmış bəstəkarların əsərləri əlyazması ilə bərabər, qədim musiqi alətləri və eyni zamanda 1920-60-cı illərdə musiqi xəbərləri nəşr olunmuş qəzetlər nümayiş etdirildi. Tədbiri giriş sözu ilə muzeyin direktoru Alla Bayramova açdı. Sonra Mədəniyyət və Turizm Nazirliyinin musiqi sektorunun sədri Fərəh Əliyeva muzeyin tarixi haqqında məlumat verdi. Çıxış edənlərdən bəstəkar Aqşin Əlibəyli tarixi irslərimizin qorunması barədə gənclərimizin məlumatlandırılmasının vacibliyini vurğuladı. Musiqişünaslar Sara Əliyeva və Sürəyya Ağayeva muzeyin fəaliyyətindəki yenilikləri alqışladılar. Tədbirin rəsmi hissəsindən sonra maestro Niyazinin "Möcüzə", "Skertso". "Adajio", "Andante", Soltan Hacıbəyovun Prelüd, Polad Bülbüloğlunun "Skertso", Fərhad Bədəlbəylinin Niyaziyə ithaf etdiyi Prelüd və Qara Qarayevin "Sonata", "Eskiz", "Yürüş" əsərləri səsləndirildi. Muzeyin direktoru Alla xanım tədbirin təşkil edilməsində və diskin maliyyələşməsində Mədəniyyət və Turizm Nazirliyinə öz təşəkkürünü bildirdi.

Sonda yuxarıda adları çəkilən bəstəkarlara məxsus indiyə qədər məlum olmayan musiqilərin toplandığı disk tədbir iştirakçılarına təqdim edildi.

Yaddaş.- 2007.- 5 aprel.- S. 4.