Yaşlı və gənc nəsil yazıçı, rəssam, bəstəkarların yaradıcılıq fəaliyyətini təmin etmək üçün xüsusi təqaüd fondu haqqında

Azərbaycan Respublikası Prezidentinin Fərmanı

Azərbaycan Respublikası Prezidentinin “Azərbaycan Yazıçılar Birliyi üzvlərinin yaradıcılıq şəraitinin yaxşılaşdırılması tədbirləri haqqında” 2007-ci il 12 mart tarixli 2023 nömrəli, “Azərbaycan Rəssamlar İttifaqı üzvlərinin yaradıcılıq şəraitinin yaxşılaşdırılması tədbirləri haqqında” 2007-ci il 12 mart tarixli 2024 nömrəli və “Azərbaycan Bəstəkarlar İttifaqı üzvlərinin yaradıcılıq şəraitinin yaxşılaşdırılması tədbirləri haqqında” 2007-ci il 12 mart tarixli 2025 nömrəli sərəncamlarının icrasını təmin etmək məqsədi ilə qərara alıram:
1. Yaşlı və gənc nəsil yazıçı, rəssam və bəstəkarların yaradıcılıq fəaliyyətini təmin etmək üçün xüsusi təqaüd fondu yaradılsın.
2. Yaşlı və gənc nəsil yazıçı, rəssam və bəstəkarların yaradıcılıq fəaliyyətini təmin etmək üçün xüsusi təqaüd fondu dövlət büdcəsinin vəsaiti hesabına formalaşdırılsın və Azərbaycan Respublikasının Mədəniyyət və Turizm Nazirliyinin mərkəzləşdirilmiş xərclərində nəzərdə tutulsun.
3. Xüsusi təqaüdün sayı, həcmi və müddəti aşağıdakı kimi müəyyən edilsin:
3.1. yaşlı nəsil üçün ayda 300 (üç yüz) manat olmaqla, bir il müddətinə, yazıçılara – 50 (əlli), rəssamlara – 50 (əlli) və bəstəkarlara – 30 (otuz) xüsusi təqaüd;
3.2. gənc nəsil üçün ayda 200 (iki yüz) manat olmaqla, bir il müddətinə, yazıçılara – 20 (iyirmi), rəssamlara – 20 (iyirmi) və bəstəkarlara – 10 (on) xüsusi təqaüd.
4. “Yaşlı və gənc nəsil yazıçı, rəssam və bəstəkarların yaradıcılıq fəaliyyətini təmin etmək üçün xüsusi təqaüd fondundan istifadə Qaydaları” təsdiq edilsin.
5. Bu Fərman imzalandığı gündən qüvvəyə minir.

İlham Əliyev,
Azərbaycan Respublikasının Prezidenti

Bakı şəhəri, 6 avqust 2007-ci il

Xalq qəzeti.- 2007.- 7 avqust.- S. 1.