Sənət xadimlərinə qayğı mədəniyyətin inkişafına yönəlib

Azərbaycan kinemotoqrafiyasının inkişafındakı xidmətlərinə görə bir çox sənətkar fəxri adlara layiq görüldü

Azərbaycan milli mədəniyyətinə və incəsənətinə dövlət tərəfindən hər zaman qayğı göstərildiyinin şahidiyik. Bildiyimiz kimi, 2 avqust kino işçilərinin peşə bayramı - Milli Kino günüdür. Bu münasibətlə ölkə Prezidenti kino xadimlərinə fəxri fərmanların verilməsi ilə bağlı sərəncam imzalamışdır. Azərbaycan kinemotoqrafiyasının inkişafındakı xidmətlərinə görə, bir çox şəxslərə respublikanın xalq artisti, xalq rəssamı, əməkdar artist, əməkdar incəsənət xadimi, əməkdar mədəniyyət işçisi adları verilmişdir. Onlardan bir neçəsi ilə əlaqə saxlayıb, belə bir əlamətdar gündə onların fikirlərini öyrəndik. Xalq artisti Yalçın Əfəndiyev:

   - Azərbaycan kino sənətinin tarixi bir əsrdən artıq dövrü əhatə edir. Belə bir tarixi dövrü yaşamış milli kinomuzun inkişaf dövründə bu sahənin çoxlu sayda mütəxəssisləri yetişmiş və Azərbaycan kinosunun dünya ölkələrində geniş bir şəkildə təbliğ edilməsinə şərait yaradılmışdır. Ötən gün kino günü ərəfəsində İlham Əliyev cənablarının imzaladığı sərəncam əsasında bir çox sənət xadimləri ilə yanaşı, mənə də respublikanın xalq artisti adı verilmişdir. Bu dövlət rəhbərinin Azərbaycan kino sənətinin inkişafında xidmətləri olan şəxslərə böyük diqqət və qayğısıdır. Hər zaman biz bu isti münasibəti üzərimizdə hiss etmişik. Deyim ki, sənət xadimlərinə olan bu münasibətin təməli ümummilli liderimiz Heydər Əliyevin hakimiyyəti dövründə qoyulmuşdur. Onun hakimiyyətdə olduğu illərdə Heydər Əliyev kino işçilərinə xüsusi qayğı göstərir və "Azərbaycanfilm" studiyasında istehsal olunan bütün filmləri, ilk növbədə, özü nəzərdən keçirib, sonra efirlərdə nümayiş etdirilməsinə icazə verirdi.
Kino ilə bağlı olan dövlət tərəfindən tapşırılan bütün planları izləyir və təqdim olunan filmlərin çəkilişi üçün lazım olan ehtiyatların ödənməsinə çalışırdı. Onu da deyim ki, ilk dəfə olaraq, onun əmri ilə kinematoqrafiyaya fonddan 700 min dollar valyuta ayrıldı ki, bu da görünməmiş bir hal idi. Həmin vəsait hesabına studiyaya texniki vəsaitlər alındı. Prezident tərəfindən sənət xadimlərinə fəxri adların verilməsi də, məhz onun hakimiyyətə gəldiyi zamandan başlandı. Yaradıcı şəxslərin əməyi, istedadı yüksək qiymətləndirildi.
Bu gün Heydər Əliyevin yeritdiyi xətt İlham Əliyev tərəfindən uğurla həyata keçirilir. Elə bir sənət nümayəndəsi tapmaq mümkün deyil ki, İlham Əliyevin bu münasibətini yüksək qiymətləndirməsin. Sənət xadimlərinin mənzillə təmin olunması, Prezident təqaüdünün verilməsi, eləcə də, fəxri adların təqdimatı mədəniyyət və incəsənətimizə olan qayğının təzahürüdür. Biz sənət nümayəndələrinə belə bir diqqət əhvali-ruhiyəmizi yüksəldir, daha da məsuliyyətlə işləməyimizə stimul verir. Düzü, deyim ki, mənə bu fəxri adın verilməsi çox gözlənilməz oldu. İnanmırdım ki, mənim fəaliyyətim məhz bu şəkildə qiymətləndirilə bilər.
   "Azərbaycanfilm" kinostudiyasında 45-dən artıq sənədli film, 10-a qədər tammetrajlı film çəkmişəm. Bundan sonra da bir rejissor kimi Azərbaycan sənətinin inkişaf etdirilməsi naminə daha məsuliyyətlə çalışacaq, ölkə Prezidentinin mənə göstərdiyi etimadı doğruldacağam. Bir daha sənət xadimlərinə göstərilən bu diqqət və qayğıya görə dövlət rəhbərimizə minnətdarlığımı bildirirəm.
Xalq rəssamı
Nəsirov Rafiq:
   - Kino işçilərinin peşə bayramı bizim üçün ikiqat sevincə səbəb oldu. Hər il olduğu kimi, bu il də Prezident İlham Əliyev bir çox sənət xadimlərinin kino sahəsindəki xidmətlərini yüksək qiymətləndirərək, kino tarixinin 109-cu ildönümündə də onları fəxri adlarla mükafatlandırdı. Bu, bizim üçün əsil bayrama çevrildi. Ölkə Prezidenti Azərbaycan kinosuna hər zaman diqqət ayırmış və kinemotoqrafiya sahəsində çalışan şəxslərin yaradıcılıq fəaliyyətinin daha da geniş bir şəkildə reallaşdırılması üçün Cəfər Cabbarlı adına "Azərbaycanfilm" kinostudiyasının dünya standartlarına uyğun bir şəkildə təmir etdirilməsi ilə bağlı sərəncam imzalamışdır. Artıq Prezidentin sərəncamına əsasən, 2008-ci ildə kinostudiya Avropa standartlarına uyğun olaraq fəaliyyətini davam etdirəcəkdir. Təbii ki, dövlət tərəfindən sənət xadimlərinə göstərilən bu qayğı, məhz Azərbaycan mədəniyyətinin və incəsənətinin inkişafına yönəldilmişdir. Mən bir rəssam kimi 30 ildən artıqdır ki, kinostudiyada fəaliyyət göstərirəm. İlk işim "Məlikməmmədin nağılı" filmində olub. Sonralar Azərbaycanın çox istedadlı rejissorları olan Eldar Quliyev, Oqtay Mirqasımov, Rasim Ocaqov, Ramiz Əzizbəyli, Rövşən Almuradlı kimi yaradıcı şəxslərlə birgə fəaliyyət göstərmişəm. Azərbaycanda istehsal olunan 35-ə qədər bədii filmin rəssamı olmuşam. Bundan əlavə, dünyanın bir çox ölkələri və telekanalları ilə birgə əməkdaşlıq fəaliyyətim olmuşdur. Belə ki, Polşada, İranda istehsal olunan filmlərin, eləcə də, NTV, ORT kimi telekanalların çəkdikləri müxtəlif məzmunlu nümunələrdə rəssaam kimi fəaliyyət göstərmişəm.
Hazırda isə çəkilişləri davam edən "Cavad Xan" filminin rəssamıyam. Yaradıcı şəxs kimi Azərbaycan kino sənətinin inkişaf etdirilməsinə bütün qüvvəmi səfərbər edərək, bundan sonrakı fəaliyyətimdə də dövlətin mənə göstərdiyi etimadı doğrultmağa çalışacağam. Dövlət rəhbərinin belə bir gündə mənə fəxri ad verməsini yüksək qiymətləndir və bir daha dərin minnətdarlığımı bildirirəm.

Səs.-2007.-3 avqust.-S.12.