Rzalı R.

Uğurlarımız da görəcəyimiz işlər də çoxdur

Dünən "Novosti" Beynəlxalq Mətbuat Mərkəzində respublika Mədəniyyət və Turizm Nazirliyinin 2007-ci ilin altı aylıq fəaliyyətinə və yeni teatr mövsümünün açılışına həsr olunmuş mətbuat konfransı keçirildi.
Nazir Əbülfəs Qarayev dedi: "İlin əvvəlində birillik iş planı hazırlayıb təsdiq etmişdik. Lakin ötən müddətdə respublika Prezidenti İlham Əliyev mədəniyyət və turizm sahəsinin inkişafı ilə bağlı bir sıra dövlət əhəmiyyətli sənəd imzalamışdır. Dövlət rəhbərinin qəbul etdiyi qərarlar əsasən milli-mədəni irsimizin və memarlıq abidələrinin qorunması, parkların salınması, muzeylərin və kitabxana işinin yaxşılaşdırılması və mədəniyyətin mühüm sahələrinin inkişafı barədədir. Biz vaxt itirmədən bu qərarları icra etməliyik.
Nazir bildirdi ki, altı ay ərzində təkcə Bakıda yox, ölkənin digər rayon və şəhərlərində də müxtəlif tədbirlər həyata keçirilib. "Bir sıra nüfuzlu beynəlxalq mədəniyyət tədbirlərində də iştirak etmişik. Artıq dünyanın elə bir yeri yoxdur ki, orada keçirilən tədbirlərdə Azərbaycanın mədəniyyət və incəsənət nümayəndələri iştirak etməsin. Ən böyük uğurlarımızdan biri ölkə Prezidenti İlham Əliyevin və Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın gərgin əməyi nəticəsində Qobustan tarixi-bədii qoruğunun Dünya Mədəni İrs Siyahısına daxil olmasıdır. Artıq Qobustan qoruğu bəşəri əhəmiyyət daşıyır, təkcə Azərbaycanın deyil, dünyanın mədəni sərvəti hesab olunur. Başqa bir uğurumuz müasir rəssamlıq məktəbini təmsil edən bir neçə azərbaycanlı gəncin Venetsiyada keçirilən rəssamlıq sərgisinə qatılması ilə bağlıdır. Azərbaycan ilk dəfədir ki, bu tədbirə qatılmışdır. Bu gün də bizim orada pavilyonumuz açıqdır. Orada Azərbaycan rəssamlarının əsərləri nümayiş olunur. Üçüncü uğurumuz da beynəlxalq tədbirə ilk dəfə qatılmağımızla bağlıdır. Caz festivalında Azərbaycan ilk dəfə idi ki, iştirak edirdi. Başqa uğurlarımız da çoxdur. Azərbaycan Simfonik Orkestri və Opera Orkestri beynəlxalq tədbirlərdə iştirak edir".
Nazir Ə.Qarayev bildirdi ki, bu yaxınlarda Almaniyada keçirilən festivalda Azərbaycandan dəvət olunmuş kollektiv əsas heyətlə çıxış edirdi. Rauf Abdullayevin rəhbərlik etdiyi Dövlət Simfonik Orkestri İtaliyada keçirilən çox nüfuzlu beynəlxalq festivalda iştirak edib.
Görüləcək işlərdən danışan nazir Ə.Qarayev qeyd etdi ki, oktyabrın 3-də Moskva şəhərinin Bakıda mədəniyyət günləri keçiriləcək. Avropada keçirilən "Avrovijn" müsabiqəsinin ölkəmizdə yayımlanmasına gəlincə, artıq müqavilə imzalanıb və bu mötəbər tədbir İctimai Televiziya kanalı vasitəsilə reallaşacaq. Teatrın mövsümünün açılışına toxunan nazir qeyd etdi ki, teatr və konsert mövsümünün açılışına ciddi hazırlıq görülür: "Azərbaycanın hər yerində teatr yeni mövsümün açılışına hazırlaşır. Qərara gəlmişik ki, teatr mövsümünün açılışı hər il sentyabrın 15-də keçirilsin. Bu il də teatr mövsümünün açılışı Akademik Milli Dram Teatrının qarşısında keçiriləcək. Muzey və kitabxana işinin yaxşılaşdırılması istiqamətində də bir sıra görüləsi işlər nəzərdə tutulub".
Konfransın sonunda nazir Ə.Qarayev jurnalistləri maraqlandıran sualları cavablandırdı.

Azərbaycan.-2007.-30 avqust.-S.2.