Vətən sərhədlərinin keşiyində

mövzusunda müsabiqəyə

yekun vurulmuşdur

 

Avqustun 14-də Dövlət Sərhəd Xidmətinin (DSX) Heydər Əliyev Elmi Araşdırmalar Mərkəzində Sərhəd Qoşunlarının yaradılmasının 88-ci ildönümünə həsr olunmuş "Vətən sərhədlərinin keşiyində" mövzusunda müsabiqənin yekunları ilə bağlı mərasim keçirilmişdir.

Mərasimdə çıxış edən DSX-nin ictimaiyyətlə əlaqələr şöbəsinin rəisi, polkovnik Cəbrayıl Əliyev ölkəmizdə yaradıcı insanlar üçün yaradılmış əlverişli şəraitdən danışmış və bildirmişdir ki, ulu öndər Heydər Əliyev mədəniyyət, incəsənət adamlarına həmişə qayğı ilə yanaşmış, onların əməyini yüksək qiymətləndirmişdir.

C.ƏIiyev ulu öndərimizin layiqli davamçısı, Silahlı Qüvvələrin Ali Baş Komandanı, Prezident İlham Əliyevin də yaradıcı insanlara göstərdiyi diqqət və qayğıdan danışmışdır.

Natiq qeyd etmişdir ki, Dövlət Sərhəd Xidmətinin çoxsahəli fəaliyyətində hərbi vətənpərvərlik tərbiyəsi, Vətənə, onun sərhədlərinə məhəbbət hissinin gücləndirilməsi prioritet istiqamətlərdəndir. Bu istiqamətdə həyata keçirilən tədbirlər içərisində müxtəlif yaradıcılıq müsabiqələrinin təşkili xüsusi yer tutur. Hər il olduğu kimi, bu il də Sərhəd Qoşunlarının yaradılmasının ildönümü münasibətilə "Vətən sərhədlərinin keşiyində" mövzusunda kino sənəti, bədii ədəbiyyat, təsviri sənət və digər sahələr üzrə 6 nominasiyada müsabiqə elan olunmuşdur. Müsabiqədə ölkəmizin peşəkar və həvəskar rəssamları, şair və yazıçıları, sərhədçi əsgərlər, sərhədçi zabit və gizirlərin ailə üzvləri də iştirak etmişlər.

DSX rəisinin müavini, general-mayor Fərhad Tağızadə, Yazıçılar Birliyinin sədri, xalq yazıçısı Anar, Yazıçılar Birliyinin birinci katibi, xalq şairi Fikrət Qoca və başqaları müsabiqə iştirakçılarını təbrik etmiş, onlara yeni yaradıcılıq uğurları arzulamışlar.

Bildirilmişdir ki, yaradıcılıqla məşğul olan insanlar müsabiqəyə böyük maraq göstərmişlər. Elan olunmuş nominasiyalar üzrə müsabiqəyə çoxsaylı əsərlər təqdim edilmişdir. Təqdim olunmuş əsərlərin janrları da, müəlliflərin yaş, təhsil, sosial mənşəyi peşəkarlıq səviyyəsi müxtəlifdir.

Qeyd olunmuşdur ki, ölkəmizin vətəndaşlarının öz yaradıcılıq duyğularını sərhəd mövzusuna yönəltməsi, sərhəd sərhədçilər haqqında fikir ifadə etməyə çalışması böyük uğurdur.

Sonra qaliblərə mükafatlar qiymətli hədiyyələr təqdim olunmuş, təsviri sənət nümunələri nümayiş etdirilmişdir.

 

Azərbaycan.- 2007.- 15 avqust.- S. 3.