TÜRKSOY-dan minnətdarlıq məktubu

Mədəniyyət və Turizm Nazirliyinin mətbuat xidmətindən verilən məlumatda deyilir ki, 2007-ci ilin iyul ayında Türkiyənin İstanbul şəhərində "IV TÜRKSOY fotoqraflar görüşü" keçirilmişdir. Tədbirdə TÜRKSOY-a üzv olan Azərbaycan, Türkiyə, Qazaxıstan, Qırğızıstan, Özbəkistan, Başqırdıstan, Qaqauz Yeri, Şimali Kipr Türk Cümhuriyyəti, Saxa-Yakutiya, Tıva və Tatarıstandan 11 fotoqraf iştirak etmişdir. Layihədə iştirak edən fotoqraflar İstanbulun tarixi və görməli yerlərində olmuş və çəkdikləri şəkilləri TÜRKSOY-a təqdim etmişlər. Tədbirin ənənəsinə görə, türkdilli fotoqrafların çəkdikləri əsərlərin kataloqu hazırlanır, həmçinin, sərgilər təşkil olunur və ayrı-ayrı ölkələrdə nümayiş etdirilir. Bu ilki layihədə respublikamızı Fotoqraflar Birliyinin üzvü, istedadlı fotoqraf Asim Talıb təmsil etmişdir. Bir neçə gün öncə, TÜRKSOY baş direktorunun müavini Mustafa Balçık Mədəniyyət və Turizm Nazirliyinə təşəkkür məktubu göndərmişdir. Məktubda türk dünyasının təbliğinə, türk dünyası sənətçilərinin bir-birinin yaradıcılıqları ilə yaxından tanış olmasına yaradılan şəraitə, həmçinin, istedadlı fotoqraf Asim Talıbın tədbirdə iştirakına görə minnətdarlıq bildirilir.

Xalq qəzeti.- 2007.- 22 avqust.- S. 5.