Sumqayıtda N Gəncəvinin 3,9 metr hündürlüyündə tuncdan abidəsi ucaldılıb

Sumqayıt şəhərinin mərkəzi hissəsində Nizami meydan salınıb. Azərbaycanın dahi şairi Nizami Gəncəvinin adını daşıyacaq meydan Nizami küçəsinin başlanğıcında yaradılıb. Meydanın mərkəzində Nizami Gəncəvinin 3,9 metr hündürlüyündə tunc heykəl-abidəsi ucaldılıb. Bu barədə məlumatı Sumqayıt şəhər İcra Hakimiyyəti başçısının müşaviri Teymur Vəliyev verib. Meydanın inşasına Sumqayıt şəhər İcra Hakimiyyətinin başçısı Vaqif Əliyevin təşəbbüsü ilə cari ilin əvvəlində başlanıb. Meydanın uzunluğu 188 metr, ümumi sahəsi 6300 kv. metrdir. Qeyd edək ki, əvvəllər burada qanunsuz küçə ticarəti olub və antisanitar vəziyyət hökm sürüb. Hazırda isə meydanda dekorativ ağaclar, yeni oturacaqlar, tullantı konteynerləri, müasir işıqlandırma sistemi quraşdırılıb.

Mövqe.-2007.- 9-10 avqust.-S.2.