Ev

 

Məncə kinomuzun indiki durumunda hər kəs filmin müəlliflərinə təşəkkür etməlidir

 

Rejissor- Asif Rüstəmov, ssenari müəllifləri - Ramiz Fətəliyev, Asif Rüstəmov, quruluşçu operator Adil

Abbas, rəssam - Rafiz İsmayılov, Rafiq Nəsirov,

bəstəkar - Xəyyam Mirzəzadə.

 

Süjet müasir notlarda qurulub. Dörd tərəfdən modern göydələnlərlə əhatə olunmuş məkanın ortasında yarıuçuq ev dayanıb. Evin yerləşdiyi məkanın müştərisi çoxdur. Maklerlər (Telman Əliyev, Nəzifə Nəbiyeva, Yalçın Səlimov) oranın sahibi Anarı (Rasim Cəfərov) bezdiriblər. O, işsiz olmasına baxmayaraq, heç bir vəchlə evini satmaq istəmir. Ev kimsəsiz, tənha bir insan olan Anarı həyata bağlayan yeganə teldir. Onun gələcəyi yoxdur. Yaşamında evin timsalında sadəcə keçmiş xatirələr var.

Bu arada yaxın bir dostu (Emin Seyfulla) Anara təklif edir - bayramqabağı səməni yetişdirib satmaq... Ev başdan-başa səmənilərlə bəzənib. Hətta soyuducunun buzluğunda da səməni cücərir. Səmənilərlə birlikdə Anarın həyatına məhəbbət daxil olur, ümidlər, arzular yaranır. Gələcək peyda olur. Maklerlər yenə ondan əl çəkmirlər. Sevdiyi qadını (Təranə Əliyeva) evdə döyülmüş tapan Anar nəhayət ki, evi satmağa razılaşır. Keçmiş gələcək arasındakı yarışmada ikinci qalib gəlir. Anara görə... Amma qələbə yoxdur. Heç gələcək yoxdur. Sadəcə böyük bir illüziya var. Hətta məhəbbət yoxdur. Leyla da bu illüzyanın, evi Anardan almaq üçün qurulmuş tamaşanın oyunçusudur. Müəlliflər bir neçə dəfə bu illüziyanın sirrini aça bilməsi üçün tamaşaçıya ipucu da verir. Birinci dəfə filmin əvvəllində... Leyla Anar qəbiristanlıqda rastlaşırlar. İkinci dəfə - Leyla buz dolabındakı səmənini ət maşınından keçirib halva hazırlamaq istədiyi epizodda... Buzluqda unudulmuş digərləri kimi qırmızı lentlə bəzənməmiş səməni elə Anarın özüdür.

Filmin sonunda Anar evi - keçmişini yandırır. Artıq o, keçmişsiz gələcəksizdir yalnız indidən ibarətdir - azaddır.

Məncə, Azərbaycan kinosunun indiki durumunda hər kəs Rasim Gəfərovu kinoya gətirdikləri üçün filmin müəlliflərinə təşəkkür etməlidir. (O, filmdə o qədər orqanik görünürdü ki... Bu filmdə ekrana hamıdan çox yaraşırdı).

Elə operator, rejissor işinə digər aktyorlara görə !

 

Kino+.- 2007.- 17 avqust.- S. 3.