Azərbaycan rejissorunun filmi

Moskvada Eldar Ryazanovun yubiley

şənliklərində göstərilmişdir

Tanınmış Azərbaycan rejissoru, xalq artisti Vaqif Mustafayevin "Milli bomba" filmi Moskvada görkəmli Rusiya rejissoru, dramaturqu və ssenariçisi Eldar Ryazanovun anadan olmasının 80 illiyinə həsr olunmuş tədbirlər çərçivəsində nümayiş etdirilmişdir. V.Mustafayevin və xalq yazıçısı Elçinin ssenarisi əsasında çəkilmiş filmin nümayişi "Xudojestvennı" kinoteatrında təşkil edilən retrospektiv "Ryazanov və şagirdləri" proqramına daxil olunmuşdu. Baxış başa çatandan sonra Kino evində keçirilən gecədə çıxış edən Eldar Ryazanov öz yetirmələri, o cümlədən 1982-85-ci illərdə onun emalatxanasında ikiillik Ali ssenariçilər və rejissorlar kursunda oxumuş Vaqif Mustafayev haqqında xeyli xoş sözlər demişdir.

Xatırladaq ki, 2004-cü ildə çəkilmiş film elə həmin il MDB ölkələrinin və Baltikyanı ölkələrin "XXI əsrin yeni kinosu" Birinci beynəlxalq Avrasiya kinofestivalında və V Rusiya açıq komediya filmləri festivalında Qran-pri mükafatlarına layiq görülmüşdür.

Vaqif Mustafayev demişdir ki, onun üçün təmizlik, alicənablıq və yüksək peşəkarlıq etalonu olan Eldar Ryazanov kimi korifeyin yubiley tədbirinə dəvət almaq hazırda yüksəliş dövrü yaşayan Azərbaycan mədəniyyətinin xidmətlərinin tanınması deməkdir.

Respublika.- 2007.- 30 avqust.- S. 2.