İbrahimova S.

Azərbaycan Hollivudla ayaqlaşmaq iddiasındadır

Kinoda baş verəcək çevriliş bunu deməyə əsas verir

Ölkə başçısının Azərbaycanda kino sənətinin inkişafı ilə bağlı sərəncamı Kino Günü ərəfəsində vacib məsələlərdən birinə çevrilib. Kinematoqrafçılar İttifaqının katibi Abbas Əliyevin fikrincə, Azərbaycan kinematoqrafiyasının sərəncama böyük ehtiyacı vardı: "1975-ci ildən kinematoqrafiyanın nə mənəvi, nə də maddi imkanı yox idi. Buna baxmayaraq, dünya kinosu güclü şəkildə inkişaf edirdi. Hər yarımildən bir texnologiya təzələnirdi. Məhz buna görə də Azərbaycan bu sahədə çox geridə qalırdı. Ölkə başçısının məlum sərəncamı bu geriləməni aradan qaldıracaq. Bütün kinematoqrafçılar kimliyindən, işindən asılı olmayaraq, böyük ümidlə təkliflər paketinin təsdiqini gözləyirlər".

Rüstəm İbrahimbəyovun təşəbbüsü ilə Kino məktəbinin fəaliyyətini sıçrayış adlandıran A.Əliyev hesab edir ki, məktəbin dövlətin qayğısına ehtiyacı var. Əks təqdirdə onun fəaliyyətində axsamalar yarana bilər: "Kino məktəbində yalnız ali təhsilli məzunlar oxuyacaqlar. Sənət ocağı onların püxtələşməsində, dünya bazarına inteqrasiyasındatəkan rolunu oynayacaq. Düzdür, Mədəniyyət və İncəsənət Universitetində də kino təhsili sahəsində müəyyən addımlar atılır. Amma orada müasir texnikanın istifadə qaydaları öyrədilmir. Bu kimi parametrləri nəzərə alıb Kino məktəbini açmışıq. Onlar müəyyən vaxt burada təcrübə kursları keçəcəklər. Bir neçə ildən sonra onların potensialı ictimaiyyətə, xüsusilə də kino xadimlərinə məlum olacaq".

Kinematoqrafçılar İttifaqının katibi əlavə etdi ki, məktəbdə təhsil alan gənclərə xaricdə də təcrübə kursları keçmək imkanı veriləcək. Onun fikrincə, tələbələrin mübadilələrə böyük ehtiyacı var: "Xarici avadanlıqların dilini bilmək üçün öncəonları xaricə göndərmək, sonra avadanlıqları bura gətirmək lazımdır" - deyə o bildirdi.

Dövlət Film Fondunda aparılan təmir işlərindən söz salan kino xadimi qeyd etdi ki, Rusiya arxivlərində qorunan Azərbaycan filmləri bura gətiriləcək. Onların şərait üzündən Rusiya arxivlərində saxlanıldığını etiraf edən A.Əliyev sərəncamdan sonra bu və ya digər qlobal məsələlərin həllini tapacağını söylədi. Eyni zamanda qeyd etdi ki, daşınma prosesi 2008-ci ildən başlayaraq qarşıdakı on illiyi əhatə edəcək.

A.Əliyev onu da qeyd etdi ki, Film Fondunun standartlara uyğun fəaliyyəti istiqamətində Mədəniyyət və Turizm Nazirliyinin yaradıcı qrupu çalışır. Binanın yenidən qurulması və digər vacib işlər onların öhdəsindədir.

Ölkə başçısının məlum sənərcamından irəli gələn məsələlərdən biri də kinoicarənin yenidən qurulması məsələsidir. Bu barədə söz salan həmsöhbətim: "Sirr deyil ki, Azərbaycanda kinoicarə pis vəziyyətdədir. Bununla bağlı yeni kinokomplekslərin tikintisi nəzərdə tutulub. Həmin binalar dünya standartlarına cavab verəcək. Yeni kinoteatrlar iri zalları, avadanlıqları və müasir görünüşü ilə diqqəti cəlb edəcək. Eyni zamanda, burada kafelər, attraksionlar fəaliyyət göstərəcək. İnsanları kinoya cəlb etmək naminə onların bütün istirahətlərini təmin etmək qərarına gəlmişik. "Nizami" qədimkinoteatr olsa da, təmirdən sonra standartlara cavab verən ilk kinokompleks olacaq. Belə nəzərdə tutulub ki, yenidənqurma işləri başa çatdıqdan sonra bütün beynəlxalq kino festivalları həmin ünvanda keçirilsin. Hazırda isə həmin stantdartlara cavab verən kinoteatr yalnız "Azərbaycan"dır. Amma oranın tamaşaçı tutumu ürəkaçan deyil. Böyük zala 180 nəfər tamaşaçı ancaq toplamaq mümkün olur. Hazırda təmir işləri gedən Heydər Əliyev adına Sarayda da kino qurğularının quraşdırılması nəzərdə tutulub. Bununla orada da festivallar keçirmək mümkün olacaq" - dedi. "Uşaqlar üçün xüsusi zalların tikilməsi nəzərdə tutulub?" sualını cavablandıran A.Əliyev qeyd etdi ki, bu, daima diqqət mərkəzində olub. Sadəcə, kinodakı çatışmazlıqlar bunu həyata keirməyə imkan verməyib: "Bir çox kinematoqrafçılar sovet ittifaqı dağıdıldıqdan sonra hansı işlə istədi, məşğul oldu. Bəziləri su satırdı, bəziləri sürücülük edirdi. Bunların hamısı geridə qoyduğumuz keçid dövrünün qurbanları idi. Peşəkarları yenidən kinoya cəlb etmək üçün əlimizdən gələni edirik. Bu gün - sabah yeni avadanlıqlar gətiriləcək, böyük layihələr həyata keçiriləcək. Cavanlar onların öhdəsindən tək gələ bilməzlər. Ağsaqqallara həmişə ehtiyacımız var. Bir müddətdən sonra "Azərbaycanfilm" Kinostudiyasının təmiri də yekunlaşacaq. Artıq səviyyəli və dünya bazarına çıxarılası ekran işi ərsəyə gətirmək üçün heç bir çətinliyimiz qalmayacaq

Kaspi.-2007.-4 avqust.-S.18.