Kinoya dair təkliflər paketi Nazirlər Kabinetinə təqdim olunub

Əsas hədəf Azərbaycan kinosunun dünyada tanınmasıdır

Mədəniyyət və Turizm Nazirliyi Azərbaycan Kinematoqrafçılar İttifaqı ilə birgə kino sahəsinin inkişafına dair hazırladığı təkliflər paketini Nazirlər Kabinetinə təqdim edib. Bu barədə Azərbaycan Kinematoqrafçılar İttifaqının katibi Abbas Əliyev məlumat verib. O bildirib ki, təkliflər dövlət başçısının kino sahəsinin inkişafı ilə bağlı imzaladığı sərəncam əsasında hazırlanıb. İttifaq katibinin sözlərinə görə, hazırlanan təkliflər paketində Azərbaycan kinosunun beynəlxalq bazara çıxarılması və yeni texnologiyaların istehlakı, beynəlxalq səviyyəyə cavab verəcək filmlərin hazırlanması üçün dövlət tərəfindən yetərincə vəsaitin ayrılması, yeni yaradılan Kino Məktəbinin dövlət tərəfindən himayəyə götürülməsi, müasir avadanlıqların alınması yer alıb. A.Əliyev əlavə edib ki, təkliflərdə əsas hədəf kimi Azərbaycan kinosunun beynəlxalq səviyyədə tanınması üçün dünya standartlarına cavab verəcək filmlərin hazırlanması göstərilib.

"Eyni zamanda, gənc və professional mütəxəssislərin yetişdirilməsi və kinoya cəlb olunması təklif olunub. Hazırda Nazirlər Kabinetində hazırlanan təkliflər paketinə baxılır. Nazirlər Kabineti təkliflərimizi təsdiq etdikdən sonra dövlət başçısına təqdim olunacaq" - deyə A.Əliyev qeyd edib.

Kaspi.-2007.-3 avqust.-S17.