Müharibədən bəhs edən filmlərə çox vəsait xərclənir

Elxan Qasımov Bu gün kinoya sponsorluq edən şirkətlər, təşkilatlar çox azdır

Deyirlər kino mədəniyyətdir. O mədəniyyət ki, hər bir xalqın özünə məxsus xüsusiyyətləri, adət-ənənələri burada əks olunur və onun hansı xalqa mənsub olmasından xəbər verir. Bir vaxtlar digər sahələrdə olduğu kimi kino sahəsində də müəyyən problemlər yaşandı və kino tənəzzülə uğradı. Xeyli müddət belə davam etsə də, prezidentin kinonun inkişafı ilə bağlı verdiyi sərəncam onun inkişafına təkan verdi. Yenə də problemlərin olmasına baxmayaraq bu sahədə müəyyən dirçəliş müşahidə olunur və irəlləyişlər nəzərə çarpır.
Bununla bağlı rejissor Elxan Qasımov öz fikirlərini bizimlə bölüşdü. O, kinonun bugünkü inkişafını yüksək qiymətləndirərək kinodakı irəliləyişlərdən söhbət açdı. Kinoda olan problemlərin bir hissəsini də texniki avadanlığın tələblərə cavab verməməsi ilə bağlayan rejissor Azərbaycanda texnikanın zəif olduğunu dilə gətirdi: "Artıq nazirliyin tapşırığı ilə yeni filmlər çəkilir. Amma buna baxmayaraq, hazırkı texnika filmlərin yüksək səviyyədə ərsəyə gəlməsinə imkan vermir. Avadanlıq deyil, elə bil traktordur. Artıq bu sahədə Prezidentin sərəncamı var. Texnikanın yenilənməsi üçün kifayət qədər vəsait ayrılıb. Yəqin ki, yaxın günlərdə bu problem aradan qalxacaq". Sonra isə kinoya sərf olunan vəsaitin həddindən artıq aşağı səviyyədə olduğunu vurğuladı. Rejissordan normal səviyyədə film çəkmək üçün nə qədər vəsait lazım olduğunu soruşduqda, o "baxır filmə, konkret məbləğ demək mümkün deyil". deyə cavab verdi: "Müxtəlif mövzuda filmlər çəkilir. Amma təqribən desək, ən çox vəsait tələb edən filmlər döyüş və müharibədən bəhs edən filmlərdir. Çünki burada həm istifadə olunan alətlərin alınması və ya kirayəsi, həm də döyüş paltarlarının tikilməsi üçün xeyli vəsait tələb olunur. Bu gün də kinoya sponsorluq edən şirkətlər, təşkilatlar çox azdır". Bu arada Elxan Qasımov filmin ərsəyə gəlməsində böyük əziyyəti olan aktyor heyətinin sonda əməyinin az məbləğlə qiymətləndirilməsini qeyd etdi: "Aktyorlar filmdə çəkdikləri əziyyətə görə çox az qonarar alırlar. Hələ mən rejissoru, operatoru demirəm. Çünki filmdə əsasən oyunçular əziyyətlərə qatlaşır.
Hətta elə filmlər var ki, bəlkə də aktyor o hərəkətləri etməklə həyatını təhlükəyə atır. Lakin buna baxmayaraq, onlar sənətlərini sevdiyindən hər şeyə göz yumurlar. Onu da qiymətləndirmək lazımdır". Azərbaycan filmlərinin gələcəyini yüksək səviyyədə görən Elxan Qasımov sonda filmlərimizin dünyada nümayiş olunacağına inandığını bildirdi.

Üç nöqtə.-2007.-15 avqust.-S.13.