Rəhimqızı Z.

 

Əbülfəs Qarayev: Kinostudiyanın həyəti özəlləşdirilməyib

 

Nazir deyir ki, orada tikiləcək obyekt "kinonun inkişafında müəyyən rol oynayacaq"

 

Ötən həftə Mədəniyyət və Turizm Nazirliyində yarımillik fəaliyyət planına dair kollegiya iclası keçirildi və eyni zamanda cari ilin iş planı təsdiqlənərək icraata buraxıldı. Nazirliyin hesabatı və fəaliyyət planları haqqında ötən gün mətbuata açıqlama verən nazir Əbülfəs Qarayev öncə görülən işlərdən söz açdı. O, bildirdi ki, bir il müddətində mədəniyyət və turizm sahəsində ölkə başçısı tərəfindən 40 sərəncam və fərman imzalanmış, 7000-ə yaxın kadr məsələsinə baxılmışdır.
Nazirliyin yarımillik fəaliyyətinə dair 46 səhifəlik sənədə eyni zamanda 3 möhtəşəm nailiyyət daxildir ki, bunlar Qobustanın Ümumdünya İrs siyahısına daxil edilməsi, 10 azərbaycanlı gənc rəssamın Venesiya seminariyasında təmsil olunması və Montre şəhərində keçirilən 42-ci beynəlxalq caz festivalında Şahin Növrəslinin qalibiyyətidir.
Nazir bildirdi ki, simfonik və opera orkestrlərinin İtaliya və Almaniyada keçirilən beynəlxalq tədbirlərdə əsas proqramla çıxışı cari ilin hesabatında xüsusi önəm daşıyır. Bununla yanaşı nazirlik kino, muzey, kitabxana və s. sahələrdə verilən qərarların icrası ilə bağlı müəyyən addımlar atıb. Teatr fəaliyyətindən söz salan nazir: "aktyorların beynəlxalq festivallara çıxışı sürətlə gedir. Sevindirici hallardan biri isə budur ki, 20 il müddətində teatrlar ilk dəfə maraqlı nəticə əldə ediblər. Yəni ki, tamaşaçı tutumu və tamaşaların sayına görə sənət ocaqları planı 98 faiz yerinə yetiriblər. Bəlli olduğu kimi, bu ildən etibarən hər il sentyabrın 15-i teatr mövsümünün açılışı qeyd olunacaq. Teatr və sənət adamları ilə birlikdə gələn ay təntənəli günü Füzuli meydanında qeyd edəcəyik. Həmin gün bir sıra təqdimatlar nəzərdə tutulur", - dedi.
Rusiyada keçirilən Azərbaycan mədəniyyət günlərini xatırladan nazir oktyabrın 3-dən etibarən paytaxtda Rusiya mədəniyyəti günlərinin başlanacağını qeyd etdi. Bunun ardınca respublikada bir sıra mədəniyyət günlərinin təşkili cari ilin proqramına daxil edilib. Evrovisiona hazırlıqla bağlı tədbirlər planından söz salan Əbülfəs Qarayevin sözlərinə görə, H.Əliyev adına Fond bu işdə onlara dəstək olur.
İki gün öncə Dəvəçidən qayıdan nazir səfərinin məqsədindən danışarkən dedi ki, orada Tarix Diyarşünaslıq Muzeyinin tikintisi ilə maraqlanıb. Yenidənqurma işlərinin başa çatdırıldığını deyən mədəniyyət və turizm naziri eyni zamanda Qusarda inşa edilən yay-qış turizm kompleksi ilə də maraqlanıb.
Söhbət zamanı nazir abidələr, heykəllər və barelyeflərin bərpasından da danışdı. Eyni zamanda bildirdi ki, bərpa üçün yararsız olan kiçik tarixi əşyalar toxunulmaz qalacaq. Onun sözlərinə görə, həmin qalıqlar da tarixin bir hissəsini təşkil edir. İncəsənət muzeyinin təmirinin yüksək səviyyədə aparıldığını qeyd edən dövlət rəsmisi bildirdi ki, noyabrda Xalça muzeyi də təmirə dayandırılan sənət ocaqları siyahısına daxil ediləcək.
Teatrlara gəlincə, nazir Kukla Teatrının bu ilin dekabrında istifadəyə veriləcəyini söylədi. Daha sonra Rus Dram Teatrı, Gənc Tamaşaçılar Teatrı teatrsevərlərin ixtiyarına veriləcək. Nazir H.Əliyev adına Sarayda aparılan təmir işlərinin isə gələn il başa çatdırılacağını söylədi. Dövlət Film Fondu barədə onu öyrəndik ki, 6 mərtəbədən ibarət olacaq sənət ocağı standartlara uyğun tikilir, - "yeri gəlmişkən, qeyd edim ki, tezliklə ekranlaşdırılacaq filmlərin ssenariləri üzrə müsabiqələr təşkil olunacaq. Qalib gələn ssenari dövlət hesabına ekran həllini tapacaq". Nazir çıxışında yaxın günlərdə 2 musiqi məktəbinin açılışında iştirak edəcəyini da xatırlatdı.
Rusiyalı tarixçinin Qara Qarayevin adını erməni bəstəkarı kimi təqdimatına mövqeyini bildirən nazir öncə yazarın səhvini xatırlatmış və onu ideoloji təxribat adlandırmışdır: "Biz heç vaxt imkan verməyəcəyik ki, mədəni əsərlərimiz bədnam qonşuların kitabına yazılsın. Həmişə demişəm ki, bu, ideoloji müharibədir. Biz təbliğat kampaniyasını dayandırmadan aparmalıyıq".
Diqqətinizə çatdıraq ki, qəzetimizin ötən buraxılışında Rasim Balayevin Kinostudiyanın ərazisinin özəlləşdirilməsi ilə bağlı fikirləri dərc olunmuşdu. Onun mövqeyinə münasibət bildirən nazir aktyorun fikirlərini əsassız adlandırdı.
Xatırladaq ki, Kinostudiyanın 4 hektarlıq ərazisinin mədəniyyət və turizm nazirinin məktubuna əsasən Əmlak Komitəsi tərəfindən özəlləşdirildiyini iddia edən xalq artisti buna etirazını bildirmişdi.
Mətbuat kofransından öncə qəzetdəki materialla tanış olan nazir Kinostudiyanın və onun həyətinin yalnız kinoya xidmət etdiyini bildirdi. Hasara alınmış 4 hektarlıq əraziyə gəlincə, Ə.Qarayev oranın dövlət əhəmiyyətli olduğunu və tikiləcək obyektin kinonun inkişafında müəyyən rol oynayacağını bildirdi.

 

Ayna.-2007.-30 avqust.-S.8.