Ermənilərin oğurluq faktları araşdırılır

Azərbaycan ÜTT qarşısında “Kor ərəbin mahnısı” və “Vokaliz” lə bağlı iddia qaldırıb

Fikrət Əmirovun “Kor ərəbin mahnısı” və müğənni Brilliant Dadaşovanın “Vokaliz” mahnı əsərinin ermənilər tərəfindən oğurlanması ilə bağlı Müəllif Hüquqları Agentliyinin Ümumdünya Ticarət Təşkilatına müraciəti əsasında əqli mülkiyyətin qorunması ilə bağlı beynəlxalq tədbir keçiriləcək. Bu barədə APA-ya Azərbaycan Müəllif Hüquqları Agentliyinin hüquq şöbəsinin müdiri Xudayat Həsənli bildirib. Azərbaycan Ümumdünya Ticarət Təşkilatının dəstəyi ilə keçiriləcək toplantıda əqli mülkiyyətin qorunması, bu sahədə əməkdaşlıq kimi məsələlər ətrafında fikir mübadiləsi aparılacaq. Yaxın vaxtlarda keçirilməsi nəzərdə tutulan beynəlxalq tədbirə bir sıra xarici ölkələrin nümayəndələri qatılacaqlar. Eyni zamanda , Müəllif Hüquqları Agentliyi ermənilərin xalqımızın mədəniyyət və incəsənət nümunələrinin oğurlamaları istiqamətində beynəlxalq təşkilatlarla mütəmadi iş aparır. Bu məqsədlə agentliyin sədr müavini Oqtay Səmədov Ümumdünya Ticarət Təşkilatının (ÜTT) Cenevrədəki ofisində olub. Sədr müavini Cenevrədə keçirdiyi görüşlərdə Azərbaycan bəstəkarı Fikrət Əmirovun “Kor ərəbin mahnısı” və müğənni Brilliant Dadaşovanın “Vokaliz” mahnı əsərinin ermənilər tərəfindən oğurlandığını ÜTT-nin rəsmilərinə çatdırıb. Azərbaycan tərəfinin iddiası qurum tərəfindən qəbul edilib. Məsələnin araşdırılması Ümumdünya Əqli Mülkiyyət Təşkilatının Arbitraj Qrupuna həvalə olunub. Müəllif Hüquqları Agentliyi artıq Arbitraj Qrupuna müraciət edib. Onun sözlərinə görə, Arbitraj Qrupu münaqişə qrupu statusu daşıyır. Buraya müraciət etməkdə məqsəd F. Əmirovun “Kor ərəbin mahnısı” və B. Dadaşovanın “Vokaliz” mahnısını ermənilərin özününküləşdirməsinə son qoymaqdır. X. Həsənlinin sözlərinə görə, hələ 2004-cü ildə Müəllif Hüquqları Agentliyi “Vokaliz” mahnısının ermənilər tərəfindən oğurlanması ilə bağlı Ümumdünya Əqli Mülkiyyət Təşkilatının Arbitraj Məhkəməsinə müraciət edilib. Cari ilin əvvəlində isə agentlik “Kor ərəbin mahnısı” ilə bağlı quruma növbəti müraciət ünvanlayıb: “Ümid edirik ki, bu dəfə müraciətimiz cavabsız qalmayacaq. “Kor ərəbin mahnısı”nın və “Vokaliz”in azərbaycanlı müəlliflərə məxsus olması barədə kifayət qədər dəlil-sübut var ki, həmin sənədlər də Ümumdünya Əqli Mülkiyyət Təşkilatının Arbitraj Qrupuna göndərilib

Yeni Azərbaycan.-2007.-8 avqust.-S.8.