Ələddinqızı N.

 

Mədəniyyət Turizm Nazirliyi etiraz məktubu ünvanlayıb

 

"Tək nazirlik deyil, damarında azərbaycanlı qanı axan hər bir kəs bu cür təxribatlara qarşı ən sərt formada etiraz etməlidir "

 

İngiltərənin məşhur Britaniya ensiklopediyasında və rusiyalı alim Kiril Tomovun "Yaradıcı ittifaqlar: Sovet bəstəkarların professional təşkilatları, 1939-1953-ci illər" kitabında Qara Qarayevin erməni bəstəkarı kimi təqdim edilməsi ilə bağlı Mədəniyyət və Turizm Nazirliyi etiraz məktubu ünvanlayıb. Mədəniyyət və Turizm Nazirliyinin mətbuat katibi İntiqam Hümbətovun məlumatına əsasən, məsələ ilə bağlı Azərbaycanın hər iki ölkədəki səfirliklərinə bu işlə məşğul olmaq üçün məktub göndərilib. Nazirlik, eyni zamanda, həmin ölkələrin mədəniyyət nazirliklərinə və müəlliflərə etiraz məktubu da göndərib: "Tək nazirlik deyil, damarında azərbaycanlı qanı axan hər bir kəs bu cür təxribatlara qarşı ən sərt formada etiraz etməlidir.

Biz buna öz etirazımızı çatdırırıq çatdıracağıq da".

Qeyd edək ki, Rusiyalı alim Kiril Tomovun "Yaradıcı ittifaqlar: Sovet bəstəkarların professional təşkilatları, 1939-1953-ci illər" kitabının 249-cu səhifəsində Stalin mükafatı üzrə Yaradıcı Şuranın üzvləri sadalanarkən müəllif Rusiyadan bəstəkar Şostakoviçin, Ukraynadan opera müğənnisi Litvinenko-Velegemountun, Belorusdan opera müğənnisi Aleksandrovskayanın, Ermənistandan isə Qara Qarayevin bu şuraya üzv olduğunu yazıb. İngiltərənin məşhur Britaniya ensiklopediyasında da azərbaycanlı bəstəkarlar haqqında bölmədə Qara Qarayev erməni kimi təqdim olunub.

 

Səs.- 2007.- 29 avqust.- S. 12.