Əliağa Quliyevə aid sənədlər arxivə təqdim olunub

Görkəmli tarzən, xalq artisti Əliağa Quliyevin 90 illik yubileyi ərəfəsində ona aid 500-ə yaxın sənəd yaxın günlərdə araşdırıcıların ixtiyarına veriləcək

Bu barədə APA-ya Salman Mümtaz adına Dövlət Ədəbiyyat və İncəsənət Arxivinin direktoru Maarif Teymur məlumat verib. O bildirib ki, sənədləri arxivə xalq artistinin oğlu Adil Quliyev təqdim edib. Materialların arasında Əliağa Quliyevin Rəşid Behbudov, Zeynəb Xanlarova, Əhməd Bakıxanov, Cahangir Cahangirov, Həbib Bayramov, Şövkət Ələkbərova, Sara Qədimova və başqa korifey sənətkarlarla fotoşəkilləri, solo konsertlərinin afişa proqramları yer alıb.
Qeyd edək ki, İkinci Dünya Müharibəsində iştirak edən Əliağa Quliyev hərbi hissələrdə azərbaycanlılardan ibarət musiqi kollektivini yaradanlardan biri olub. Materialların arasında bu faktı təsdiqləyən sənədlər də var.

Bizim yol.-2007.-1 avqust.-S.15.