Günel

Musiqi dərsliklərini müəllimlər belə qavramır

Orta məktəblərdə tədris olunan musiqi dərsliklərinin səviyyəsi bəzi mütəxəssisləri, həmçinin də musiqi müəlimlərini narazı salır. Mütəxəssislər ibtidai siniflər üçün yazılan musiqi dərsliklərini şagirdlər bir yana, çox zaman müəllimlərin belə qavramadığını bildirirlər. Bütün bunlara aydınlıq gətirmək üçün, orta məktəb musiqi dərsliklərinin müəliffi, professor, bəstəkar Oktay Rəcəbovla əlaqə saxladıq.
Bəstəkar bildirdi ki, Azərbaycanda musiqi dərslikləri yeni yaranmağa başlayıb: “Azərbaycan müstəqil olandan sonra, təxminən 8 il musiqi dərslikləri yazılmadı. Ilk dərsliklər 1997-ci ildən başlayaraq yaranmağa başladı”.
Bəstəkarın sözlərinə görə, əvvəlcə rus bölməsinin 1, 2, 3, 4-cü sinifləri, sonra isə Azərbaycan bölməsinin şagirdləri üçün musiqi dərslikləri hazırlanıb: “Nəhayət 2005-ci ildə mənim rəhbərliyimlə 1-4-cü siniflər və 8-ci sinif üçün Azərbaycan dilində musiqi dərslikləri yarandı. Deyim ki, bu günə kimi ölkədə 8-ci sinif üçün musiqi dərsliyi olmayıb. Azərbaycanın tarixində ilk 8-ci sinif üçün musiqi dərsliyi isə satılmadığına görə, yığışdırıldı”.
O. Rəcəbov qeyd etdi ki, musiqi dərslikləri yaranmazdan əvvəl orta məktəblərdə Təhsil Nazirliyinin təsdiq etdiyi proqram əsasında dərs keçirilib: “Həmin proqram 1978-ci ildən 1985-ci ilə kimi orta məktəblərdə eksperimentə buraxıldı. Sabiq maarif naziri Elmira Qafarovanın göstərişilə mən bu eksperimenti 30 Bakı və 15-ə yaxın bölgə məktəblərində keçirdim. Yaxşı da effekt verdi”.
Müsahibimizin deyir ki, hazırda orta məktəblərdə tədris edilən musiqi dərsliklərinin səviyyəsi qanaətbəxşdir. Onun sözlərinə görə, sovet dövründə təhsilə, mədəniyyətə xüsusən də dərsliklərə çox diqqət yetirilirdi: “Müstəqilliyin ilk illərində ölkədə maliyyə vəziyyəti o qədər yüksək olmadığına görə, bu sahəyə az diqqət ayrılırdı. Indi isə vəziyyət nisbətən yaxşıdır. Son bir neçə ildə, 2005-ci il daxil olmaqla, artıq bizim ümumtəhsil məktəbləri üçün musiqi dərsilikləri hazırlanıb. Azərbaycanın nüfuzlu şəxsiyyətləri, alim və pedaqoqlar bu işə qoşulublar. Özüm musiqi dərslikləri hazırlayarkən orta məktəb müəllimi olan Tamella Babayevanı pedaqoq kimi bu işə cəlb etmişəm. 6-7-ci siniflər üçün isə dərsliyi Oqtay Zülfüqarov və Vidadi Xəlilov yazıb. Çox gözəl də dərslik yaranıb. 8-ci siniflər üçün dərsliyi rəhmətlik Tofiq Quliyev, Gülnaz Abdullazadə və mən hazırlamışdıq. Qeyd edim ki, bu dərslik Tofiq müəllimin vəfatından sonra, çap olundu”.
Musiqi dərsliyi sahəsində xırda problemlərin olduğunu istisna etməyən O.Rəcəbov bildirdi ki, dərsliklərdən əlavə not xrestomatiyası, fono xrestomiyanın hazırladıb çap olunması lazımdır: “Yəni uşaqların bu musiqinin necə səsləndiyini eşitmək üçün disklər hazırlanmalıdır. Bundan savayı elektron dərsliklər yaradılmalıdır”.

Azadlıq.- 2007.- 8 avqust.- S. 12.