Təbliğat, təbliğat, yenə də təbliğat

Brilliant Dadaşovanın fikrincə, ermənilərin plagiatlığına qarşı mübarizə aparmağın yollarından ən əsası Azərbaycan musiqisini dünya arenasında tanıtmaqdır

Azərbaycan Müəllif Hüquqları Agentliyi ermənilərin xalqımızın mədəniyyət və incəsənət nümunələrini oğurlamalarına qarşı ciddi mübarizə aparır. Agentlik bu istiqamətdə beynəlxalq təşkilatlarla mütəmadi iş aparır. Bu məqsədlə Agentliyin sədr müavini Oqtay Səmədov Ümümdünya Ticarət Təşkilatının Cenevrədəki ofisində olub. Sədr müavini Cenevrədə keçirdiyi görüşlərdə Azərbaycan bəstəkarı Fikrət Əmirovun "Kor ərəbin mahnısı" və müğənni Brilliant Dadaşovanın "Vokaliz" mahnı əsərinin ermənilər tərəfindən oğurlandığını ÜTT-nin rəsmilərinə çatdırıb. Azərbaycan tərəfinin iddiası qurum tərəfindən qəbul edilib. Məsələnin araşdırılması Ümümdünya Əqli Mülkiyyət Təşkilatının Arbitray Qrupuna həvalə edilib.

Öyrəndik ki, Müəllif Hüquqları Agentliyi artıq Arbitray Qrupuna müraciət edib. Agentliyin hüquq şöbəsinin müdiri Xudayət Həsənlinin sözlərinə görə, Arbitray qrupu münaqişə qrupu statusu daşıyır. Bura müraciət etməkdə məqsəd isə Fikrət Əmirovun "Kor ərəbin mahnısı"nın və Brilliant Dadaşovanın "Vokaliz" mahnısının ermənilərin özününküləşdirilməsinə son qoymaqdır.

Xatırladaq ki, hər iki müəllifin mahnıları erməni müğənniləri tərəfindən ifa edilir, hətta bu mahnılara artıq klip də çəkilib.

Xudayət Həsənlinin sözlərindən o da məlum oldu ki, hələ 2004-cü Respublika Müəllif Hüquqları Agentliyi "Vokaliz" mahnısının ermənilər tərəfindən oğurlanması ilə bağlı Ümumdünya Əqli Mülkiyyət Təşkilatının Arbitray Məhkəməsinə müraciət edib. 2007-ci ilin əvvəlində isə agentlik "Kor ərəbin mahnısı" ilə bağlı quruma növbəti müraciət ünvanlayıb: "Ümid edirik ki, bu dəfə müraciətimiz cavabsız

qalmayacaq".

Xudayət Həsənli onu da bildirdi ki, "Kor ərəbin mahnısı"nın və "Vokaliz"in azərbaycanlı müəlliflərə məxsus olması barədə kifayət qədər dəlil-sübut var ki, həmin sənədlər də Ümumdünya Əqli Mülkiyyət Təşkilatının Arbitray qrupunagöndərilib.

"Vokaliz" mahnısının müəllifi Brilliant Dadaşovanın fikrincə, ermənilərə qarşı mübarizə aparmağın yollarından biri və ən əsası Azərbaycan musiqisini dünya arenasında tanıtmaqdır: "Mən bu qənaətdəyəm ki, ifaçılarımız beynəlxalq səviyyədə təşkil edilən tədbirlərdə ermənilərin özününküləşdirməyə çalışdığı mahnıları ifa etməlidirlər. Fikrimcə, konsertlərin musiqi tərtibatını hazırlayan səlahiyyətli şəxslər bilərəkdən məhz bu mahnıları proqramlara daxil etməlidirlər. Digər xalqların nümayəndələri bir dəfə də olsa bizim ifamızda bu mahnıları eşitsələr, mübahisəyə ehtiyac qalmayacaq. Onlar həmin andaca başa düşəcək ki, bu, Azərbaycan mahnısıdır. Çünki bizim mahnılarımız muğam üzərində yazılıb. Belə mahnıları isə ancaq azərbaycanlı oxuya bilər. Beləliklə də biz dünyaya bu mahnıların Azərbaycana aid olduğunu sübut edə bilərik. Təbliğat, təbliğat, yenə də təbliğat əsas olmalıdır!"

Yeri gəlmişkən, Brilliant Dadaşova Azərbaycan Müəllif Hüquqları Agentliyinə gördüyü işlərə görə minnətdarlığını bildirdi.

Onu da qeyd edək ki, Azərbaycanda Ümümdünya Ticarət Təşkilatının dəstəyi ilə əqli mülkiyyətin qorunması ilə əlaqədar beynəlxalq tədbir keçiriləcək. Müəllif Hüquqları Agentliyindən verilən məlumata görə, belə tədbirin keçirilməsi Azərbaycan tərəfinin müraciəti əsasında qərara alınıb. Artıq bu barədə ÜTT Müəllif Hüquqları Agentliyinə məktub göndərib. Yaxın vaxtlarda keçirilməsi nəzərdə tutulan beynəlxalq tədbirə bir sıra xarici ölkələrin nümayəndələri qatılacaqlar. Toplantıda əqli mülkiyyətin qorunması, bu sahədə əməkdaşlıq kimi məsələlər ətrafında fikir mübadiləsi aparılacaq.

Kaspi.- 2007.- 8 avqust.-S. 17.