Məhəbbət Kazımovun Can Azərbaycanadlı albomu işıq üzü görüb

Məhəbbət Kazımovun "Can Azərbaycan" adlı yeni albomu bu yaxınlarda işıq üzü görüb. Müğənninin sözlərinə görə, yeni alboma daxil olan 12 mahnının hamısının musiqisi özünə, sözləri isə müxtəlif şairlərə aiddir. Məhəbbət Kazımov alboma daxil olan mahnılardan ikisinə klip çəkdirməyi düşünür. Bunlardan biri "Can Azərbaycan", digəri isə "O gözlərdə gözüm qalıb" adlanır. Qeyd edək ki, "Can Azərbaycan" mahnısının sözləri Zahir Abbasa, aranjimanı isə Mahir Tahiroğluna, "O gözlərdə gözüm qalıb" mahnısının sözləri Zemfira Əlişqızına aiddir. Klip çəkilişlərinə sentyabr ayında başlanılacaq.
Bundan başqa payız mövsümündə hər kəsin ciddi iş rejiminə başlayacağını deyən Məhəbbət Kazımov özünü də o insanların sırasında görür. Müğənni planlarından söhbət açaraq bildirdi ki, o, daha bir albom buraxmağı və tamaşaçıları qarşısında konsert verməyi düşünür. İkinci albomun Yeni il öncəsi işıq üzü görəcəyini dilə gətirən Məhəbbət Kazımov ilin sonunda ərsəyə gətirəcəyi albomun bir qədər fərqli olacağını söylədi. O, qeyd etdi ki, bu dəfə Səid Rüstəmov, Ramiz Mirişli, Cahangir Cahangirov kimi böyük sənətkarların yaradıcılığına və xalq mahnılarına müraciət edəcək. Bir sözlə, unudulmuş və keçmiş mahnıları yeni aranjimanda ifa edərək yeni alboma daxil edəcək.
Müğənninin konserti isə yaz aylarında, daha dəqiq desək Novruz bayramında baş tutacaq. Məhəbbət Kazımov bu layihələrin həyata keçirilməsi işlərinə artıq indidən başlayıb.

Üç nöqtə.-2007.-22 avqust.-S13.